WINDHOEK-Mbunga Politika zaCoD kazitente asi simpe kapi zina tokora asi nazikakara nakandindate akarumbasane moupresidente ndi hawe, awo kuna kuyimona asi kuvhura vakahamenemo nsene asi nombunga politikagona naditokora asi tadikakara nakandindate gumwe. Nsene asi nombunga politika dimwe naditokora asi vakare nakandindate gumwe varwanese mbunga zaSWAPO, ndi asi kandindate gwazo Hage G. Geingob. Presidente gwaCOD Ben Ulenga yige katente mbudi ezi kovanambudi mosikondo vike, monkurumbara zaNamibia.Ulenga katente asi mbunga zendi hawe nazikakara nomagano asi ngano nombunga mpatanesi dilipakerere unene ava vakara asi magano gawo goupolitika kwalifana.Apa nye tuna kara ngesi CoD, ngahamena momahoroworo gana kuwiza. Ano nsene kozili mbunga zina kugazara asi kuvhura vayalipakerere varwanese mbunga zaSWAPO, hawe CoD kuna kuyindindira. Kapi yina kuvatera tukare tupu tatudimbi rusumo rumwe nkenye apa nye naga wiza mahoroworo ose nkenye gumwe penge wange. CoD, kuna hara kulipakerera nonombunga dimwe yipo asi momahoroworo varuganene kumwe yimo ana kutanta Ulenga. CoD, kwakere kutunda mo 1999-2009 mbunga mpatanesi zopaveta, nye momahoroworo gokukwamako kwayazumbanesa kwaRDP.
Nononkambadaro nye daDTA, edi ana kara nado ngesi CoD, kuna kukankama asi udigu una wiza, pwanare Ulenga kwaparapo asi age kapi ngalipakerera nombunga nkenye asi morwa kuna hara kurwanesa SWAPO. Ose mbunga zoudemokoli twahepa kutara asi mbunga zina kulipakerera kwetu zahepa kukara asi kuna kuliza neyi aturwanene. Yimo ana kutanta ngoso mukarelipo gwanare koBritain mepangero lyombunga zaSWAPO. Kapi yina kara asi udigu wokuhamena momahoroworo welike, nye kuna kara hena noudigu woyimaliva eyi nombunga politika adigwana mombongarero zanavenye, unene vava vakaramo. Mbunga zendi ngesi kuna kuza tupu zikagwane N$ 400 000, 00 kepangero ano siruwo oso mbunaga politika zaSWAPO azo tazikagwana N$22 zonomiliyuna. Eyi yangesi kapi totanta asi kuna kugendapo nawa. Yimo simpe ana kutanta Ulenga. Nombunga politika kugwana yimaliva kukwama mavango aga vakara nago mombongarero zanavenye, ano CoD, kwakaramo tupu nevango limwe tupu eli gakara mwene Ulenga. Ulenga katente asi mbunga zendi tazikakara nembongo lyenene lyokukahorowora nompitisili mokwedi tuna yuna momazuva 5-6 July 2014, moOngwediva omu vana kundindira vantu wokusika ko 350 vakakare pepongo lina. Epongo eli kwalirundurura morwa udigu woyimaliva. Ose kwagazarere asi tukaponge kehagero lya June, nye morwa nomfa nehoreko lyaHompa Riruako yiyo nye katurundwilire.Ulenga kakalimanene atante nawa-nawa asi simpe takasikama ndi kapi ana kukasikama, nye age kuna kutanta tupu asi kuvhura agave mpito kovanona nye nsene vantu vendi vanamuhara simpe kuvhura kutwikira asi mpitisili zaCoD. “Apa ngesi kwato ogu ana tumburange, simpe kapi nadiva.” “ Ose mombunga zetu kapi mwakara asi nompitisli mukare nehuliso kukuhorowora, nye kuna kumoneka asi ame nakaramo siruwo. Nsene ngavatumburange hawe nawa tupu ano nsene kapi vanatumburange nganiruganena nogo ana kara moumpitisili. CoD, momahoroworo ogo gana kuwiza unene tavakademenena kugavera evhu, ekuliko, mavango gounkurungu ntani mukaro gopaparu