BUITEPOS – Kalahari ǁHûi!nâǂharis, Omaheke ׀Kharib !nâ ǁgoes di Buitepos ׀hûhâsib khoen ge ǁîn tsîna ׀gūǁae ׀asa kliniksa gere ׀hui-am. Nēs ge ai!â ge ǂoa wekheb Fraitaxtsēs ai ge īsa. Buitepos ge Namibiab !hū׀goras !āros ǁîs a dana ǂoa tsî ǂgâxa-ams sada ǁanǁare!hūb, Botswanaba-ūsa. Buitepos ge 113 kilometerga ǂKhoandawes aiǂoas ׀khāb ai ǂnôa.
Nē ׀asa kliniks ge !gōsase ׀omkhâi ra ׀hûhâsib Buitepos dib tsî ׀gūse sada !hū׀goras tawa ǁgoe !garo!ādi Botswana!hūb didi, ׀onǂgais ai Charles Hills, Xanaxas tsî Karukubis hâdi tsî ׀nîn noxopa ǂaihe taman tsîn di khoena ǂurusib !oabade nî mā. ׀Hûhâsib Bloubergs, hîa ǁaupexa 50 kilomerga !khawagas ׀khāb nē !hū׀goras !āsa xu ǁgoes tsîn ge nē kliniksa xu nî !oabahe. ׀Asa kliniks nî nē ׀hūhâsiga !khōǂgāba !gâi!gân di ׀gui-i ge, !nūse !naris ǂKhoandawes ǁga ׀ae!khōdi !aromasa nî ǁaraǂui. ǁNā ׀hûhâsib di ׀hûhâsi ǂgaeǂgui-aos, Fransiska Hoases nē ׀hui-ams di !nae!khaisa gere !haras ge Namibiab di ǂhanuba ׀gaisa koasa mā tsî ge mî, ǁîs ra !gôa!gâsa ǂurusib !oabaden khoena ׀gūse ra hā-ūbahe !khaisa. ǁAegu ra hā, ׀ûxūhen hâ ǁîn di ǂhanub xa tin ra ǂâi tsî tsâsende, xawen hoa !gâi xūna hâna gaxu ǁaeba ra ūsa.
Nē ǁaxasibab gere ǂhanusise ׀hui-am soab aib ge Dr. Richard Kamwib, Ministeri, ǂUrusib tsî ׀Hûhâsi !Oabadi ministeris diba ǁnāpa ge ׀hao hâ i khoena ge mîba, nēs a ǁgauǁgausa nē ministris ra !ereamxasib hîas nē !hūb ǁanǂgāsaben ûiga !gâi!gâi!nâs ai ūhâba ׀oasase dī׀oasa tsî ׀guitikō-o!nâsib hîa ׀hûhâsigu ǂurusib !oaba mā!khaidi ai hâba oresa hōbas ׀kha a ǁaxasa. Kamwib ge ge mî !gao!gao ǂurusib !oabade ra mā klinikdi kaise ǂhâǂhâsa !âsa ׀hûsigu ǂurusib ׀omkhâis air a ׀hurusa. “ Sida ge sado ǂâu׀oa hâ ǂurusib !oabade mās !ereamsa tani hâ tsî sâ tide hoa !hūǁîn nē !gâiba ׀amma tama hâ hîa. ǂHanub ge ǂurusib !oabade ǁîdi a ǂgurihai tsî ǁâǂkhō sada !norasa Namibab dise ra !gawa׀î tsî ǁnā-amaga ǁkhāb ase ra dītsâ ǂhâbasa !oabade ׀hûhâsigu tawa sī-ūsa,” tib ge ge mî.
ǁNāpab ge ׀ae!khō-aon nî ׀hûhâsigu ׀aesen hâ khoena tani׀namxasib tsî nammi !nâ nî tani !khaisa gere ׀gom׀gom!gao ǁaeb aib ge Kamwiba ׀hûhâsib khoena ge ǂgan, in ǁkhā tani׀namxasib tsî ׀namma ׀ae!khō-aona mā ǁîn kai !âsa ǁîn ǂurusiba mû!gâs ai ra ׀huru amaga. Ministeri ge mîsa !oadi ge noxopa ǂauna klinikde nē ׀kharib !nâ nî omhe, ׀nai hâdi nî !gâi!gâi!nâhe ǂurusib senderdi ase hîa. Sao radi ge ǂurusib senderdi !harib ai nî ūkhâihe; Aminuis, Otjinenes tsî Epukiros hâde nau di ׀kharib !nâ hâdi nî !gâi!gâi!nâhes guise dī hîa. Buitepos di kliniks hîa ׀ae!khō-aon hâ!khaib tsîna !khōǂgā hâs ge N$6.7 miljuns ai ge kuruhe. – Nampas