WINDHOEK-Konyara nomvhura ntane dina kukapita, udigu woyimaliva yokampani vatulirepo zahana divilisa ngesi kunakutwikira mompanguro zonene. Udigu ou kwakara asi woyimaliva yombunga zoSocial Security Commission (SSC), yinakutwaredera vaNamibia vamwe vadivikwa vakare moudigu wakahurako, vakarelipo vawo vahahende ngesi kunakukondja asi mauzoni gawo gamwe ngano vagavagusirepo aga gana vatamba. Sisa Namandje, ogu ana karerepo munambongarero gwaSWAPO, Paulus Kapia, katulirepo egano asi kampani ezi apa zakerepo siruwo sosina sirongo simpe kuna kuruganesa noveta danare kuhamena nokampani. Ano nayina apa tuna kuuyunga ngesi veta ezi vaziwapukurura kapi zina kuliza posiruwo sina varugene yokuhamena eyi yina vatamba asi umbondo ndi asi widi. Kapia namukwawo zendi Inez /Gases , Otniel Podewiltz , Sharon Blaauw, gumwe gahageka yirugana mukwayita gwanare Brigadier Mathias Shiweda na Nico Josea navenye kuna vatamba umbondo, widi ntani mukaro gokukara asi kapi vapakerere sinka yimaliva yokampani zawo, eyi yina kara asi kapi yina kuliza noveta zonokampani zomo sintokorwa 61, zomo 1973,ezi zina kara asi kwaya zitarurura nokuziwapukurura mo 2010.
Ano kuna kumoneka asi nayinye eyi kwayirugene siruwo sina azo veta simpe zanare,ano ngesi kapi zina kara hena mosirugana, yimo ana kutanta Namandje, nokugwedako asi muntu gwendi kapi tavamutengeke kukwama veta zonkurunkuru,zina kara asi ngesi kapi zina kurrugana hena. Eyi ana kumona age asi yina kuna tamba vagazarerwa navenye. Yimo ana kugwadako. Age kagwedreko asi epangero kapi talinyoka asi vantu ava ndi vanzoni ava vavatengeke kukwama veta zompe zina karapo ngesi. Podewiltz nage gelike kuna mutamba epuko lyokutambura yimaliva kwanakufa Lasarus Kandara, siruwo sina age kuna kurugana koministeli zoyirugana , ntani yimwe kuna yigweda kovakwawo navenye. Kandara kwalidipagere mwene kukwama nombudi konyima tupu zapa vamukwete. Awo kuna vatamba ekonakono lyoyimaliva yoSSC, vahundilire asi ngano vakapungure yokusika ko nomiliyuna N$30,eyi vakatulire koyiweka eyi gakere nayo nakufa Kandara, mokampani zendi zedina Avid Investment Corporation, ano yimaliva eyi kwakapitiremo tupu mwaKandara makura tayikaza mokampani zaNico Josea, kampani Nmangol investment Kampani mokwedi kwaJanuary 2005. Yimaliva eyi ngano kwayifutire nonsonso momakwedi kane. Epangero alyo kuna kara noumbangi asi yimaliva yokusika koN$ 29.5 yonomiliyuna kwayitulire koAccount zaNico Josea, mwanya kampani zaNamangol investment zakere asi zomuntu gumwe googo Josea.
Moyo yimaliva oyo nomiliyuna dokusika ko N$14.9 kwakere moaccount zaJosea zamwene kapisi zokampani. Ano age yiyo nye gatamekere kuruganesa yimaliva oyo ngwendi yamwene kwato kugazara asi kupi yatunda. Kukwama veta zonokampani, kuna tamba tupu Kapia,/Gases, Podewiltz naSharon Blaauw ano veta nye zompe ngesi kuna vatamba navenye. Ewapukururo lyoveta kuna ninkisa ahende gokampani Richard Metcalfe, atumbure mukarelipo gepangero ana karerepo Mathias Shiweda nonkango zimwe zina kara asi kapi zina kutanta Yuma kapi vana diva eyi vana kurugana. Age katente asi Morondedze kavayamugwene gaha kuliwapayikira nominute murongo tupu nare asi ngano vature veta ezi moyirugana. Nampili ngomu ana kuliza naNamandje, age kuna tura epuro lyendi namo peke eyi kayininkisire veta zipurakene. Metcalf age kahundilire mpanguro asi vahepa kurundurura yipo aka liwapayikire ehundiro lyepe morwa eli ana kara nalyo ngesi kapi lina kara hena mulyo. Werner Boesak ogu kakarerepo /Gases katente asi nage kuna kuliza naNamandje, ano Christie Mostert ogu kakere asi kuna karerepo Podewiltz novaBlaauw vavali nage kaligwire nawo.
Slysken Makando ogu kakarerepo Josea,mokukwama Legal Aid Department katente asi nampili ngomu asi muntu gwendi kapi vanamugwana epuko kuruganesa veta zokampani, nage kuna kuliza novakwawo vanakarerepo vantu vawo momukaro gwangesi. Marondedze age katente asi vantu ava kwarugene epuko eli posiruwo soveta zanare vahepa kuvapangura kukwama veta zoozo zanare. Awo kwarugana epuko kukwama veta zanare nampili yikare asi veta ngesi vaziwapukurura. Muhahende Christi Liebenberg kahundilire vahahende ava asi vana vape nye siruwo mungura vahepa kuwiza vanaliwapayikire kwato kuyahundira heap asi kapi vana liwapayikire. Vagazarerwa navenye kwatunda modorongo noyimaliva yina siki ko N$10 000.