Xoa-aos: Sabina Elagos
׀AE‖GAMS – Namibian College of Open Learnings(Namcols) di ‖khā‖khāsenaon ge ╪Khoesaob di 28 kōse noxopa ‖aeba ūhâ xoamâisens kurikorobe ra dīhe ׀nûgus, ‖Gae╪amsa Xoas ׀Nûgus Xrat 10s tsî 12s hâra !aromas !gao.
Uajoroka Kazombiazes, Namcols di !Augaba xu hâ ‖Gau!nâs di !Khōdana-aos tsî ‖khāti a nē ׀nûgus di mû╪amaos, ge ge mî, nē ׀nûgus nēsi ׀nai !nani kuriga !khoe hâsa tsî ׀ō-aisase Namcols di studentn Xrat 10s tsî Xrat 12s hâra din !aroma ׀gui a ‖khowa-amsa !khaisa. Nēn ge student hîa sao ra ‖khākhā!âgu !aroma ge xoa╪gāsen hâna: Hurigowab, Afrikaans, Otjihererob, Oshindongab, Oshikwanyamab, Rukwangalib tsî Silozi tsî ׀gam‖î gowagu tsîna. ‖Khātin ge studentn hîa ge English Communication Course !aroma a xoa╪gāsenn tsîna a !norasa nē ׀nûgus !nâ ‖haosa. “Sida ge studentna ra ╪gao╪gao!nâ ╪gao in ga ‖în di ‖gûsi gowagu tsîna nē ׀nûgus !nâ a sîsenūsa, Namcols ra ‖gūba nē ׀nûgudi !nâ-ū studentn di xoas ‖khāsiga omkhâisa amaga,” tis ge Kazombiazesa ge mî.
“Sida ‖khoreb ge Namcols studentn ga ‖în di gowab !am‖are׀gauba ╪hanuse sîsenū tsî ╪gao׀khāsa !harib ai hâ xoa!am‖aresîsenna a māsa.” Sao ra !hoa╪amdi xan ge a xoa ‖khā:
- ╪Hôamā╪ui!khaigu ge ╪Hanub xa nî kō!gâhe
- !Hūbaib ╪hanuga ūhâ tamab
- ‖Haos !nandi ╪gamgamsen׀hurun !nâs ge !gâi tanisen׀gauba ra kuru tsî sîsen-era mā
- Ûib ge a ׀haehe ‖oa
Studentn ge ra ╪gao׀khāhe ╪hunuma tsî ╪ans xa ׀oa hâ ‖gae╪amden nî xoasa ╪khoamîdi, mîdi‖uib, gowa╪ans, ╪hanu xoa׀gaub tsî !amkuse ׀gora╪gāsa xoa׀goradi ׀kha.
׀Nûgus ge ׀gam !âkha !nâ a ׀gora╪gāsa, ׀on╪gais ai Junior Sekondera Xrat 10’s !aroma tsî Senior Sekonderea Xrat 12s !aroma. ׀Nûgus ge haka ׀khariga !khō╪gā hâ, !khawagas, ׀awas, ‖aegub tsî ׀awas ai╪oas tsîna. ׀Haob ain ge !nona danaon ׀guina nî hâ hoa ׀kharigu ׀hao hâse. Xrat 10s !aroman ge 350sa xu 400s kōse hâ mîdi gaxusiba nî ūhâ tsî xrat 12s !aroma 450sa xu 500 mîde. ‖Îb hoan xa ╪oa╪amsa ‖gae╪ams ge N$1500 nî dan, ׀gam‖î ╪oa╪amsaba N$800 tsî !nona‖î !khaisa N$500. ‖Goe╪am-ao-i ge N$3000 nî dan.