CHOTO – Musika o munca wo luwilwe ki mutu feela u kwaluzwi cwanunu fa mwa sibaka sa naikahela sa Choto mwa Katima Mulilo mwasikiliti sa Zambezi. U ta sebeliswa ki palo ye pahami ya balitekisano bao nenze ba lekiseza fa minyako ya lintolo.
Sibaka sa naikahela sa Choto ki sesimwi sa libaka za bonaikahela seo palo ya bayahi ipahami ahulu. Musika wo, u yahilwe fa saanda sa butuna bo bulikana libima za likiti ze peli ni mianda ye ketalizoho (2 500 square metre), mi u ka tusa kuimulula musika wa kale o sebeza ka nako ya cwale, wo u luwilwe ki katengo ka tolopo ya Katima Mulilo. Musika wo munca wo, u ta sebeliswa ki ba lipisinisi za mifutafuta ba palo ye fita fa mianda ye mibeli ni mashumi a supile ni lishumi lililińwi (280). Litekiso za bucwala ni zeńwi ze kola halina kulumelelwa.
Muńaa musika ni muyaho wa lipisinisi wa Choto wo, ili yena Mutompehi Hisham Ahmed, u bulelezi ba mutende wa Nampa la Bubeli kuli mulelo wa ku yaha musika wo ne utisizwe kalibaka la kuli na bilaezwa ki balekisi ba lipisinisi bao nenze balekisezanga mileko ya bona mwa malibela a lintolo. Ba lipisinisi bao, nenze ba swenyeha kalibaka la kuli, ne ba shimba mileko ya bona kuzwisa kwa libaka za maino a bona ka zazi, mi babańwi ne ba lifa linzila za kuba tiseza yona mileko ya bona ka zazi. Mutompehi Ahmed u ize, zeo litisize mulelo wa ku yaha sibaka seo sa malekisezo sesi kateleha ni makete, mo ba mileko ba kona kulekiseza teni. Muuna wa lipisinisi ya zibahala ahulu mwa Katima Mulilo u ize sichaba sesi ńata sisupelize ahulu takazo ya kusebelisa musika wo, mi kacwale palo ya libaka za malekisezo ki kale ikwana. Palo ya likupo za malekisezo ye fita fa muanda ni mashumi a mabeli i beilwe feela fa mukoloko wa baba kalitela cwalo. Bao ba fumani ndao ya malekisezo bakana ba tela mashelenyi a fita fa mianda ye milalu ya madola (N$ 300.00) ka kweli. Ahmed u kupile ba lipisinisi ze se zwezipili mwa Katima Mulilo ku eza lipulukelo mwahali a sicaba kufitela ku tundamena ku fumana mashelenyi feela.
Musika ni muyaho wa lipisinisi u yahilwe fa mali a likana likiti ze talu za madola ( N$ 3 million) mi u kabe u beilwe lipyololo ze lila a kuketa butata (alarm systems) ni limashini ze pikicha ka zabutwela ( surveillance camera). Ka kuya ka Ahmed, u ize, kalulo ya bubeli i kaba kushangela musika kakukambekela kuyaha muyaho kuya mwa halimu , wo u kaba ni liofisi ze mashumi a malalu ni a mabeli (32) za ba lipisinisi ze likani ni za mayemo a fa halihali (small and Medium entreprises), mi kalulo ya bulalu yona i kaba ku yaha sibaka sa kuezeza mikopano (conference room), sibaka sa kumatafaleza mibili (gym) mane cwalo ni sa malekisezo (supermarket). Musika o munca wo u kwaluzwi la Bulalu simubuso ki mubusisi wa sikiliti sa Zambezi ili yena M6utompehi Lawrence Sampofu. – Nampa