WINDHOEK Oshigwana moAminuis moshitopolwa Omaheke osha tota po okakomitiye ka thikama maantu yatano mboka taya ka tala komaupyakadhi ngoka ga etitha endopo niitsa yiizemo yomakonakono gomvula ya zi ko mbyoka ya nkundipala mokati kaanasikola moshitopolwa shawo. Okomitiye oya totwa po mOmaandaha poshigongi sha ningilwe pOnderombapa sha landula iizemo ya nkundipala mOndondo onti-10 omvula ya za ko. Kansela gOpashitopolwa, Erwin Uanguta ota ti omutumba okwa li gwa longekidhwa kaagundjuka. Oshigongi osha tokola kutya okakomitiye hoka otaka ka talela po oosikola adhihe moshikandjohogololo opo ku tothwe mo iiyetithi yiizemo ya nkundipala mokati kaalongwa. Okangundu okwa tegelelwa ka ka tsakanene naanasikola, aalongisikola, aakuluntusikola oshowo omalelonongelo goosikola dhayooloka opo ya tothe mo omikundu. Nonando Uanguta ina vula okugandja omuyalu gwaanongekwa mboka ya mona iizemo yopevi, ota ti iizemo yOndondo onti-10 otayi yemateke. Kansela ota ti kakele kOsikola yaKatoolika kaRooma yedhina Mokaleng ndjoka aanasikola yawo ya pita noopelesenda dha konda 60%, oosikola oonkwawo moshitopolwa odha mona iitsa ya nkundipala. Ota ti Rietquelle Junior Secondary School oya ndopa nayi shi vulithe omvula ya za ko, noya mona ashike epito lyoopelesenda inadhi konda 50%. Uanguta ina vulu okutotha mo omikundu dhoka tadhi dhigupaleke iilonga yaanasikola, ihe ota ti okwaaneitulomo kwaalongisikola oku li shimwe shomiiyetithi yendopo. Kansela ota ti okwa koneka kutya aanongeki yamwe miitopolwa yokomikunda oya tala ko eithano lyuulongisikola ongoshilonga shopakathimbo – ano hashi longwa ashike oowili dhontumba, nokutsa unene omuthindo iilonga yawo yokomagumbo/yopaunafaalama/omapya. “Onde shi koneka poompito odhindji to adha aalongisikola taya thigi po aanasikola kaye na omulongi omanga ye li komagumbo yi ipyakidhila niimuna yawo.” Ta ti paempito dhimwe, aalongisikola ohaya kutha aanasikola posikola ye ke ya kwathele miilonga yawo koofaalama dhawo. “Peha aanasikola ya kuthe ombinga miilongadhalwa yawo konima yootundi ngaashi omaudhano nenge oompata, oto dha yi ipyakidhila niimuna yaalongisikola yawo.” Kansela ota ti shika ohashi ningwa unene uuna pe na oofanditha dhiimuna nohaya thigi po oosikola ya ka landithe iimuna yawo nenge ya ye kiituthi yontumba. Uanguta ota ti ethimbo olya pya ko opo omalelonongelo goosikola dhayooloka moshikandjohogololo ga tale neitulomo mboka taya taaguluka ooveta noku ya katukila oonkatu. “Iilyo yomalelonongelo nayi kale nemanguluko okupula aalongisikola kutya otaya longo shike pondje yosikola pethimbo lyootundi niilonga yosikola.” Omukundu moshikandjohogololo Aminuis ogwa fa hago aguke moshilongo, ngaashi Omukuluntuwiliki gwElongo moshitopolwa Omaheke, Theo Kamupingene ta yelitha momukanda ngoka a gandja omvula ya za ko shi nasha niilonga yaanasikola mOndondo onti-10 nOndondo onti-12 dhoka inadhi ya komeho okupita niitsa ya konda 50%. Momukanda ngoka, Kamupingene ota ti iiyetithi yendopo niitsa ya nkundipala oya kwatela mo uunyenge, okuya kwaanasikola kuundingosho nomahala gomainyanyudho nelongitho nayi lyiikolitha. Ota ti uundingosho nombaa dhoka dhi li popepi noosikola oshowo elanditho lyomalovu kaanona aashona oyi li yimwe yomiiyetithi yendopo. “Okuya miihulo kwaanona yepupi eshona oshowo omaupyakadhi gomomagumbo ohayi vulu wo okuya moshipala eilongo nenge eyokomeho lyiilonga mosikola kaanongekwa.” Mombapila ye, omukuluntu gwelongo ota ti opo ku hwepopalekwe elongo moshilongo, aawiliki naaleli moshigwana oye na okukonakona iinima moshikandjohogololo kehe mbyoka tayi nkundipaleke elongo nokuungaunga nayo manga kuyele. “Omalenga omanene nooyene yomikunda naya ithane iigongi miitopolwa yawo nokukumika aavali yi itule mo melongo.” Ta gwedha po kutya aakwashigwana nayo wo oye na okushilipaleka kutya aalongisikola naaniilonga moshikondo shelongo oyi itula melongo, yo aavali taya ningi haya gongala piigongi yoosikola ngele ya hiywa. Kamupingene ota ti omalelo gopamithigululwakalo oshowo omahangano gaanafaalama naga tule po oshiketha shomapendulopo shi nasha nelongo, okugandja iimaliwa yokwiilongitha opo ya yambidhidhe elongo pamukalo kehe taya vulu.