WINDHOEK Ewawa lyAagundjuka yoSwapo (Swapo Party Youth Leaque -SPYL) olya pandula Omupresidende Hifikepunye Pohamba nepangelo lyoSwapo sho ya taamba ko etalelopo lyomasiku gane lyOmupresidende gwaZimbabwe Robert Mugabe. Olaata yOomeme yoSwapo oya nyana ehololomadhiladhilo ndyoka lya thanekwa okuningilwa Mugabe. Momikanda mbali dhoSPYL kiikundaneki oshiwike shika, Amushanga gOmauyelele goSPYL, Elijah Ngurare oshowo Amushanga-kwatheli gwIikwapondje mEwawa lyOomeme yoSwapo, Margaret Mensah-Williams, ota ti omawawa gawo oga taamba ko etalelopo lyaMugabe. Omikanda dhika odha nyenyetwa nokunyanwa komahangano inaga yama kepangelo oshowo ngoka gomoshigwana ngoka inaga nyanyukilwa etalelopo lyaMugabe noge mu ningila ehololomadhiladhilo. Ngurare ota ti iita yekondjelomanguluko inayi yambidhidhwa nande nande komukwiita gumwe gwaAmerika, Britein nenge ehangano lyUukumwe waAeuropa, andola okukwatha okweetitha emanguluko, uudemokoli nengungumano tali tyapulwa ngashingeyi moNamibia. Kakele iilongo mbyoka oya kala yi li ompinge notayi yambidhidha aatondi opo onkalo yiihuna, oluhepo nuukoloni wu tsikile mewiliko lyaNdowishi oshowo aakolonyeki yalwe. “Osha za muupendafule nonyati yiigwana yaAfrika menenevi lyetu nookuume ketu muuyuni, unene omatanga gaCuba ngoka ga kala kombinga yetu.” Ota ti Mugabe okwa kala kuume kaNamibia noSwapo pethimbo lyiita iilulu yekondjelomanguluko okukondjitha uukoloni wiilongo yuuninginino nepangelo lyokatongotongo. “Mugabe okwa li wo a longekidha iiningwanima yi nasha nuukwawowanankali moZimbabwe ya nuninwa oSwapo pomimvo 1980. Mensah-Williams naye ota tsu kumwe naashoka sha popiwa kuNgurare, ta ti ekwatathano pokati koSwapo noZANU-PF yaZimbabwe olya kala lya kola pomasiku giita yekondjelomanguluko notali tsikile wo konima yemanguluko lyiilongo mbika iyali. “Osha simana okukoneka kutya omaupyakadhi gopaliko taga tsikile moZimbabwe otaga etithwa kiilongo yopondje mbyoka inayi hala okumona oshilongo shaAfrika tashi ipangele shoyene,” ta ti shoka Zimbabwe a pumbwa eyambidhidho kiishiindalongo ye, ookuume, aaholimbili niigwana muAfrika nopondje oku mu kwatha a sinde oondjindikila dhoka a tulilwa mo kiilongo yuuninginino. Ngurare ota ti oSPYL oya koneka kutya ope na aantu yamwe miigwana yaAfrika; moZimbabwe, Namibia naSouth Afrika mboka haya longithwa pambambo okukaleka po oondjindikila dhopaukwalwaala. Ota ti “Aayafrika mboka ya dheulilwa” okupopila ko iilongo yuuninginino oya tulwa momahangano inaga yama kepangelo naangoka gomoshigwana miilongo mbika itatu. Ota ti nande oye shi taamba ko kutya omahangano inaga yama kepangelo naangoka gomoshigwana oge na omauthemba nemanguluko lya shilipalekwa nokugamenwa kEkotampango, omauthemba ngaka inage ya ngambekelwa oyo awike. “SPYL noongundu dhilwe moshilongo shetu oye na wo emanguluko nomauthemba ngaka.” Onkee oSPYL oyi li ompinge nehololomadhiladhilo kehe tali ninigilwa Mugabe kAanamibia mboka kaye hole ombili nokaye na ombepo yuukwashilongo mboka yi imanga kumwe nomatanga gomutondi. Ewawa lyAagundjuka yoSwapo, ongundu tayi pangele otali indile Aanamibia ayehe ya simaneke nokutaamba ko nomaako agehe Mugabe nosheendo she mboka ye li metalelopo lyawo moNamibia. “Otatu indile aakwangeleki, aanangeshefa, aaniilonga, aalongisikola, aanasikola naayambidhidhi yuukumwe waAfrika ya gandje eyambidhidho lya pumbiwa kepangelo nokaakwashigwana yaZimbabwe mboka ya taalelwa koondjindikila dhaAmerika pamwe nookuume ke yiilongo yuuninginino.”