WINDHOEK Aasitagongalo nomitse dhomagongalo gayooloka otaya gongala mOlyomakaya okutalulula nokutula koshiyelekitho edhanonkandangala lyOngeleki komapandulopo gopankalathano nemona moNamibia. Aawiliki mbaka otaya ka kundathana wo omikalo dhoka Ongeleki tayi vulu okudhana onkandangala mokwaadha omalalakano gayo shi nasha nOndungethaneko yomumvo 2030. Omutumba ngoka tagu ka gongalela mohotela yimwe mOvenduka otagu ka unganekwa kEhangano lyedhina Association of Charismastic and Pentecostal Churches moNamibia. Olutu nduka lyongeleki olwa kalela po oongeleki dhoPentecostal noshilonga shayo okuninga omakwatathano nomalongelokumwe nepangelo oshowo omahangano galwe gongeleki nelalakano okukaleka po onkalo ombwanawa, uukalinawa nombili pambepo oshowo oonkalo dhopankalathano moshilongo. Momukanda ngoka gwa pitithwa metiyali, omupresidende gwehangano ndika, Omusita Jan Gaweseb ota ti ongeleki ongOlutu lwaKristus oyi na oshinakugwanithwa okugandja omayakulo gopambepo, gopankalathano oshowo okuyakula iilyo yayo paempumbwe dhayo dhopalutu huka kombanda yEvi. “Ehangano olye shi koleka wo kutya opo ongeleki yi vule okugwanitha po iinakugwanithwa yayo yopambepo, etumo nomayakulo gayo, kayi na oku shi ninga muuwike,” Gaweseb ta ti. Omanga Ongeleki ya koneka onkandangala yayo komapendulopo gomoshilongo, oyi na ihe okulongela kumwe nepangelo oshowo aadhaninkandangala yalwe,” omusita ta ti. Aapopi ya simana poshigongi shoka otaya ka tsa omuthindo unene kombinga yomuthika gongeleki shi nasha nokwaadha omalalakano gOndungethaneko yomumvo 2030, etumo lyayo oshowo etaandelitho lyevaangeli, nelundululo lyaNamibia okupitila moonkambadhala dhaakwambepo yayo, elundululo tali etithwa koonkondo dhegalikano, evaangeli li nasha naanona, elongo lyuuteku, Uukriste nekondjitho lyoHIV/AIDS, eshunitho pevi lyonkalo yoluhepo, okweetapo oompito dhiilonga oshowo okutala komashongo gopankalathano ga taalela aagundjuka. Omubisofi Mananga a yambukile koZimbabwe ota ka gandja oshipopiwa sha simana poshigongi shoka tashi ka egululwa pambelewa kOmudiakoni Willem Konjore ngoka e li Ominista yOmidhingoloko nOmatalelopo. Omutumba okwa tegelelwa gu ka manithe ondungethaneko yi nasha niilonga yehangano ndika oshowo okungonga po oonkatu dhoka tadhi ka kwatha ongeleki yi vule okuninga po sha shomupondo komapendulopo gopankalathano koshigwana pakutota po ooprojeka dhokweeta po iiyemo oshowo okushilipaleka kutya moshilongo omu na ombili nedhiminathanopo nosho tuu. Aasita oshowo aaleli yopambepo mboka taya ka gongala okwa tegelelwa ya ka fute N$150.