WINDHOEK Omalongekidho oge li metifa okugalulila aakwashigwana omayovi moshitopolwa shaCaprivi mboka ya tembudhwa momikunda dhawo kefundja omathimbo ga zi ko. Momaandaha, Oshikondo shOmakwatho gOpaulumompumbwe moshitopolwa shoka osha totele po okakomitiye hoka taka ka ngonga po oproholama yegalulilo lyaakwashigwana komikunda dhawo. Okomitiye ndjoka oya thikama po maakalelipo okuza kUuministeli wElongo, Ehangano lyOmushigakano Omutiligane nOngalashe yEpangelo oshowo oosenda dhi nasha nomauyelele oya pewa wo oshinakugwanithwa nomalongekidho agehe ga kwatela mo omalweendo. Ngoloneya gwaCaprivi, Bernard Sibalatani mOmaandaha okwa ti okomitiye otayi ka gandja iizemo yi nasha nomakonakono ngoka ya ninga po oshowo oproholama ayihe ndjoka tayi ka ngongwa po. Etembudho lyoyene ano oku ya fala komikunda dhawo niiyenditho okwa thanekwa li ka ningwe kuyele muAguste. Aantu yamwe mboka ye li mookamba otaya ti egalulilo lyawo komikunda dhawo andola nali ningwe ngele oosikola odha fudha opo li gandje ompito kaanasikola ya vule okuya pamwe naakuluntu yawo komagumbo gawo. “Aavali yamwe oye uvite kutya itaya vulu okuthiga po aanona yawo,” Sibalatani ta ti. Oosikola otadhi ka kala nefudho momasiku 17 Aguste. Onkalo yefundja oya dhenga unene iikandjohogololo ngaashi Kabbe, Katima lyokomikunda, Linyanti naKongola. Oosikola 11 odho unene kwa li dha gumwa pamwe naanasikola ye li 1 120 mboka kwa li ya tembudhilwa koosikola dhilwe dhoka dhi li komahala ngoka inaga yuulilwa kefundja ngaashi Schuckmannsburg, Lusese naKabbe. Nonando ombelewa yaNgoloneya inayi mona natango olopota yopambelewa, aanamagumbo yamwe moKasika naImpalila oya shuna nale komagumbo gawo. Sibalatani ota ti ombelewa ye oya tuma ko aanamembelewa kiitopolwa mbika iyali opo ya ka koleke onkundana ndjoka noku shi mona mo kutya aantu oyendji ye thike mpoka oya za mo ngiini mokamba. Sha landula komvula oyindji moAngola okuza muDesemba 2006, omulonga gwaZambezi ogwa kungulukile muFebuluali nuumvo shoka sha etitha efundja moCaprivi. Omikunda odhindji, omapya, iimuna noomboola dhomeya odha yuulilwa komeya, omanga aantu ye li omugoyi ya sa omeya, oongandu nomayoka oya kala nokuponokela aantu. Nonando efundja oli li onkalo hayi adha oshitopolwa shaCaprivi konyala omvula kehe, efundja lyonuumvo otaku tiwa olya dhiginina lya fa ndyoka lya holokele ko momumvo 1958. Efundja olya etitha wo aanafaalama poMuyako ya teye kuyele opo ya hupithe iiteyomwa yawo kefundja ndyoka lya yuulila oshitopolwa shevi lyuunamapya pEtale Lyambezi. Onkalo oya thiminike aanamapya mpoka ya teye mbala nokututila omapungu gawo komahala ngoka inaga yuulilwa. Uuwato owo wa longithwa okututa iilikolomwa yomomapya, omanga mboka kaye na uuwato taya tutu kolupadhi. Sibalatani ota ti omwedhi gwa zi ko osipana yi nasha nomapekapeko oya ningile omakonakono ge nasha nonkalo yomeya miitopolwa mbyoka ya gumwa kefundja, nosipana ndjika oye shi mona mo kutya aanamikunda ye li 7000 otaya vulu okushunithwa komagumbo gawo.