WINDHOEK – Ministera gwanare goVadinkantu, yirugana yanavenye, maudano nompo Kazenambo Kazenambo ngesi ana tengwire moPolitical Bureau zombunga zendi zaSWAPO.Etenguro lyomuntu ogu gakara nomukaro gokuuyungilira Minister gwanare munapolitika gakaramo siruwo, mombunga mpangeli Edina lyendi kavaligeve kovanambudi hamutjangantoni gombunga zaSWAPO Nangolo Mbumba, mokukwama ediveta lyombunga zawo eli kavatulirepo lyepe, sintokorwa 4,mediveta lyaSWAPO,kuna kutanta asi vahameni mokomitiye zawo zegendeso ndi asi Political Bureau vahepa kukara 24, kugwedererako Presidente, Presidentegona, Hamutjangantoni naHamutjangantonigona. Ano ava 18 vahepa nye kuvahorowora mokomitiye zontjimantjima zombunag ezi, ano ava vavali vahepa kuvatura mosirugana Presidente. Yimo ana kufaturura hamutjangantoni Nangolo Mbumba.
Age katente asi mokukwamanye eyi, mbunga zendi kazitere asi yilye ana kukwamako, yiyo nye kavamwene asi Kazenambo Kazenambo yige ana kukwamako. Ano ngesi age vanamutura asi silyo sopolitburo, kukwama ediveta lyombunga zawo. Kazenambo kwazumbanesere evango lyendi kwaministera Jerry Ekandjo, kukwama marundururo age gareterepo Presidente Hifikepunye Pohamba mwa Sindimba 2012. Mbumba simpe kahundilire asi nompitisili nadinye dombunag zaSWAPO,ngesi vahepa kurugana unene yipo asi apa navakasikira momahoroworo hawe awo vanadiva asi tavakafunda. Simpe awo kavapandwire nompitisili domomukunda Kavango apa gakere asi mukunda gumwe, omu vagendesa vaturepo nompitisili momukunda gwaKavango goutokero. Mbunga zaSWAPO ngesi kuna kara nye nonompitisili monomukunda nadinye.Kavango zoutokero ngesi kuna kara mepitisiro lya David Hamutenya.
Ntani nompitisili dombunga ezi kadihefe morwa ngesi awo vana tameke kutura moyirugana nompitisili dawo kukwama ediveta asi vakadi nawo vahehepa kukara melikwamo omu vatura asi vahepa kuvahorowora pita mugara pita mukadi. Elikwamo eli kuna kara lyokuhova mombunga zaSWAPO. Presidentegona gombunga katente asi vahepa kukatarurura etokoro eli, morwa kapi yina kutanta asi vahepa tupu kulikwama nye awo vakamone asi vagara kuna kukaheperamo unene. Age kademenene kokuhamena komadina gawo gombongarero zanavenye. Yimo vakadi tetwahepa kurugana ngoso, nye twahepa kutara asi kwato vana kunyanderamo melikwamo lyangesi. Yimo etokoro lyaSADC, nye kapi lina kutanta asi kuferera tupu murugane eyi muna kumona asi kapi yinawapa. Mwahepa kudiva asi eyi muna kurugana yina wapa ntani kapi yina kureta ezonauko megendeso ndi asi ruha rumwe vakazuvhe asi kuna kuvaninkiliramo yimo ana kutanta gumwe gwawo gombunga zaSWAPO. Gumwe gwawo katente asi hawe awo vana hafa morwa mbunga zawo yizo zimwe zina kara tazigava sihonena kuhamena elikwamo eli kutunda tupu apa mbunga zaSADC zatokora asi vanahepa kuruganesa 50/50 unene moumpitisili.