Xoa-aob: Hoandi !Gaeb
│AE‖GAMS – “Tita ge ╪gui !gomsina ge mû hîa autotsūke!gâgu khao!gâ ra hâga. Toxopa, !gōsase khamkhoesiba ‖aeba ūhâ re. Dītsâ re !norasa !narisa. Sa !goaxa ‖aebats ge sa !omgu !nâ tani hâ. Tita ge nētsē sorosi !nubisib │kha ╪nôa aitsama ta a !gû ‖oase, ‖gauo!nâ !naris tsî !gâi!gâisenmade xu.”
Nēdi ge mîdi hîa │gaisa khoeb Adam Toesea Baisakob am!nâsa xu ra ╪oaxade. Baisakob ge nē mâsib xas tsîna khaohâ kaihe tama hâ tsî ‖îb di !garise sîsens tsî ‖gui╪gāsensa xu nētsē !hūb !nâ ra mâ╪oa sorosi!nubusina ūhâ khoen di │gui. Baisakob ge ‖khāti a ╪nû‖khaeba-ao !Hūde ‖Khawa Kō!gâs │Awemā!nans Namibiab dis !nâ Hardap tsî Omusati │kharikha !aroma.
“Tita ge ╪uru aorekhoe ge i ta 11 !Khan│gôab 1990‖î kurib dis kōse. ‖Nātsēs aib ge !norasasib ‖ûb Nelson Rolihlahla Mandelaba !khōsisa xu gere !nora kaihe. ‖Nā tsē ge is ge tita ge !gû│ûsa kaise ‖khōkhōsa autotsūke!gâ-i khao!gâ. Sida ge kaise ‖khoaxase ‖îb di !norasas !nâ gere !gâi!gâisen ‖nāpab ge Mandelaba 27 kurigab ge !khōsis !nâ ūhe hâ isa xu a !nora amaga. Tita ge ti │nūkha di sîsenūsa a ╪oa!nâ tsēs ge ge ‖nā i,” tib ge ra mî xawe │gui tsûa╪gao-i tsîna ‖gau tama hâse. Baisakob ge ra mî, sorosi !nubusi-e ūhâs sats ge xū-e a dī ‖oa ti ╪âibasen tamasa.
“‖Nā ‖khō‖khōsa tsūke!gâb khao!gâ ta ge a ╪an ‖khawa ta aitsamaba xu !gû ‖khā tidesa, o ta ge ╪âi ti ûib go │am !khais ge nēsa ti. Tita ge sâ tamase sao ra dîs │kha gere !kham: Tare-i !aroma tita? Tita kom noxopa a ╪khamo. Ti ûib kom noxopa ais ‖ga ‖goe!âu te hâo.”
“Nē mâsib !nâ-i ge │khara│kharasen-e hâ tama ge ī. ╪Gui dîdi ge ti !nâ gere khâi !ereamde ta ge ūhâba tama hâ I tamas ka io hōba ‖oa ide, │guitsē ta ge ‖ō╪oa ge ‖khā‖khā-aob Petrus Cammi, Evangelise Lutherse Kerkheb Namibib dib, dib │kha a │haos kōse. ‖Khā‖khā-aob Cammi tsîn ge tita ‖khāta khami autotsūke!gâ-i !nâ sorosi!nubusib │kha ge ╪nû ‖îb ge ‖nā tsēs khao!gâ a mû│ûse.” Baisakob ge ra mî, ‖îb di ûib ge hoaragase a dawasensa ‖nā tsēs hîab ge ‖khā‖khā-aob Cammi │kha a │haotoas khao!gâ.
“╪Gui !nārode ta ge ‖khā‖khā-aob Cammi │kha ‖gam‖aredi tsî ╪gao!nâde a ‖haos khao!gâ ta ge nē mû tama ‖gûb tsî gagasi ╪gae╪gui-aob xa ûiba │kharati ge mûtsoatsoa kaihe tsî kaise ‖khawa ûib turaba hō tsî mâ ta ge !khaisa xu ūkhâisen tsî ûiba ge ûitsoatsoa. ‖Nā tsēsa xu ta ge ‖khawa kō-oa tama ge i. ‖Nās ge ge ti ûib !nâ nētsē ra ī !gâi xūn di tsoatsoa i, “ tib ge Baisakob hîa │gū‖ae ‖îb di 53 kurixasisa gere tsēdība ra mî.
‖Aupexa ‖khaisa kurigu !kharu hâseb ge Baisakoba ‖îb di Hansinas │kha !anu !gameb !nâ ge ╪gâ. Hansinas ge a ‖îb di tara tsî ‖khāti a ╪harugub !nâ !â│huru-ao. ‖Îra ge !Autsawises ╪namipeb !nâ ╪nôa !garo!ās ai ra ╪gari. “Hansinas ge ti taras │guisa hî tama hâ. ‖Îs ge a ti │ō-aisa │ae!khō-ao, │hûhâsib sîsenao, !gomsin tsî !gaesendi !gâ tsî │awemā-ao tsî !gōsase a ti ‖gâibasenhai,” tib ge Baisakoba ra mî.
Baisakob ge ‖an-tsî-╪gari!khai-e Daweb!gaos │kharib !nâ ge hō, nēsi hâ │Kharisimû╪amaos Hardap │Kharib dis, Katrina Hanse-Himarwas di huib │kha. “Tita ge a │ū mâtim ga ûi hâsa │kharisimû╪amaos di mâxō│khās ose. │Gui timî tsîs ge tita ūhâ ‖khāsiba a mû╪an os ge ‖îsa mî‖guiba ū tsî ‖an!khaisa ge mā te, tsî ta ge ╪gaoba xu hâ gangansa ra mā si ‖îs di khoexa!nâsib !aroma,” tib ge Baisakob hîa a koro │gôan ‖gû tsî ‖khāti a koro ‖nuri│gôan ‖naosaba gere mî.
Baisakob ge nētsē kaise a │guixa ╪gari-aon di │guiba. ‖îb ra mîs ge │khurub mâsib │guib ra !hâumâi bi tsîb turab ra khami a ╪gari ‖oasa. ‖Nā tsūke!gâb │kha ra !gû‖are saogugu hoagab ge a !gû!kharu!nâtoas khao!gâb ge ‖îba Ministris !Hūdi, Khoena ‖Khawa Hâ!khaimās tsî Dī-ūnusens di ministris tawa ge sîsentsoatsoa, !khōdana-aose direktorats dī-ūnusens dis !nâ. ‖Îb di dana ‖gui╪am ge is ge, sorosi!nubusina ūhâ khoena huisa in !om‖khāsiga hōbasen, ai‖g. !naokurus tsî │urina !am‖ares !nâ. Baisakob ge ra mî, ‖îb di ‖khoreb nēsib ╪nôa!nâ !haros ╪nû‖khaeba-aosis dis !Hūde ‖Khawa Kō!gâs │Awemā!nans Namibiab dis !nâs, Hardap tsî Omusati │kharikha dis !nâb ra ‖khoresa in ╪auna sorosi!nubusina ūhâ khoena !hū-omkhâis tsî !hana╪gās !âb !nâ ‖hao.