RUNDU – Okomitiye yOpashitopolwa yi nasha nOmayakulo gOpaulumompumbwe (Regional Disaster Risk Management Committee) mOshitopolwa shaKavango oyi li pokuninga omukanda gweindilo ngoka tagu keelele nenge okuya moshipala aaniilonga yepangelo opo kaa ya vule okukala ya kutwa miilonga iikando iyali ongaaniilonga yomayakulo ge nasha noshikukuta. Omukanda gopambelewa gweindilo otagu ka ningwa nOmbelewa yOmuprimamista opo yi ete po omathaneko nenge omilanduveta opo aaniilonga ayehe yepangelo ya vule okukala haya keelelwa okukutwa pakondalaka moproholama yomayakulo goshikukuta. Okomitiye otayi ti aagundjuka omayovi oye li kaa ye na iilonga moshitopolwa onkee kasha li pauyuuki opo aaniilonga yamwe ya kale haya thigi po pakathimbo omahala gawo giilonga mbyoka tayi kalelele nokundjoina oproholama yomayakulo/omakwatho goshikukuta (drought relief programme), mokulya oshipungo mboka kaa ye na iilonga. Okomitiye okwa li ya ningi etokolo sho kwa li ya tsakanene oshikando shotango metiyali moRundu.
“Andola aantu mboka ye na nale iilonga nenge ya kutwa nale kepangelo ohaya mono iiyemo komwedhi, onkee oye na okugandja oompito kuyakwawo mboka kaa ye na sha (iilonga) opo ya mone wo iilonga nenge omauwanawa,” osho omunashipundi gwElelo lyOpashitopolwa moKavango, Bonny Wakudumo, ta tsu omuthindo. Wakudumo ota ti wo kutya omukalo ngoka gokukuta miilonga aaniilonga yepangelo ongaaniilonga yomakwatho gomayakulo gopaulumompumbwe otagu yi moshipala egandjo lyomayakulo ge li nawa. “Ngele aaniilonga mbaka oya tula mo omafudho, nena kape na ngoka ta kala moombelewa okugandja omayakulo kaakwashigwana yetu, katu na okupitika onkalo ndjika yi tsikile ngeyi. Omolwashike itatu vulu okukuta miilonga aaniilonga aagundjuka yetu mboka kaa ye na iilonga nenge aakwashigwana yalwe mboka kaa ye na iilonga moshilongo, noku ya pa ompito opo ya mone wo iilonga nenge okumona oompito dhiilonga,” osho ta ti. Nonando ethaneko ndika okwa li lya tindwa kuyamwe yomaantu mboka kwa li ya kala poshigongi shoka, oyendji yomuyo okwa li taya popile osheetwapothaneko shika. Aantu mboka kwa li itaya tsu kumwe nenge itaya popile osheetwapo shika, otaya ti kutya okukuta miilonga oshigwana shaagundjuka otashi vulu “okutula moshiponga” oproholama, notashi vulika shi kale oshidhigu noonkondo kepangelo opo yi vule oku ya vulikitha ngele opwa holoka epuko lyontumba. “Shampa ashike tapu ningwa omadheulo gomondjila taga ningwa, ngame kandi wete kutya omolwashike shika itaa shi vulu okulonga,” osho Wakudumo ta ti. Okomitiye pehulilo lyomutumba okwa li lya ningi etokolo opo li longithe omayakulo gaanawino yopaveta opo ya vule okuungaunga niinima mbyoka ya nika oveta shi nasha nosheetwapothaneko shika. “Pompito ndjika, natu longitheni awike Hahende-Ndjayi (Attorney General) opo tum one omayele galwe gopaveta,” osho Wakudumo ta ti.