Omulumenhu weedula 30 okwa kwatwa po shaashi vati a denga omukainhu waye nekende lobiila moshipala ndele te mu kwata onghonga.
Oshiningwanima osha ningwa oshivike sha dja ko komukunda Engela moshitukulwa shaHangwena efimbo loufiku.
Omupopiliko wopolifi koshitukulwa shaHangwena, Warrant Andreas Nghiyolwa okwa hokolola ta ti omufekelwa okwa ya keumbo lomukainhu waye weedula 24 ko oko a ka longela oilonga oyo yoixuna.
Omufekelwa vati okwa tameka ta pula omukainhu vaye moixulo naashi omukainhu mu lombwela kutya ina hala, okwa twikila nokukondjifa. Konima vati nokonima okwe mu ningila omatilifo edipao.
Opolifi oya hokolola tai ti omufekelwa okwa nukila omukainhu ndele mu kwata keenyala noku mu denga.
Okwa ya naye vati moixulo inashi dja kehalo laye.
Opolifi oya yelifa tai ti omukainhu oku na oufemba wokutya ina hala okuya moixulo nomulumenhu waye molwaashi osha fimana opo oufemba waye ufimanekwe.
Ovalumenhu ova kumaidwa opo vaha longife eenghono okuya moixulo novanhu inava hala molwaashi oku ya omilele ohashi di kehalo lomunhu mwene.
Oshiningwanima shikwao, okakadona keedula 14 oka kwatwa onghonga kuxe weedula 44.
Oshiningwanima osha ningwa komukunda Iino moshitukulwa shaShikoto meumbo lavo.
Opolifi oya hokolola tai ti omufekelwa okwa ufana okaana monduda yaye ndele te ka longele omunyonena wopaixulo.
Umwe womuneumbo wavo oye e va mona eshi omulumenhu ou ta kwata omonakadona onghonga.
Xe okwa kwatwa po nota pangulilwa oshibofa shekwatonghonga.
Oshiningwanima shikwao, omukainhu weedula 30 okwa kwatwa onghonga pefimbo kwa li tadi keendingosho Olomakaya komukunda Ouhongo moshitukulwa shaHangwena.
Opolifi oya hokolola tai ti fiyo opapa ka pena ouyelele kombinga yomulumenhu ou molwashi ka shi vike.
Omakonakono opolifi otaa twikile moibofa aishe yomakwatonghonga.