Omulumenhu weedula 29 okwa dipaa omukainhu waye nomupini  shaashi vati a uda omahokololo  keendingosho kutya omuholike waye okwa nangalwa po.

Otaku hokololwa kutya Mika Mundjekela okwe limangekela koshi yomuti komukunda Olunkava konima eshi a dipaa omukainhu waye.

Oshiningwanima osha ningwa oshivike sha dja ko komukunda Oshuundje meumbo lavo, koshitukulwa shaMusati efimbo longula.

Omukainhu oye Angelina Shatilwe weedula 29 omukalimo womomukunda Oshuundje.

Omukulunhu koshikondo shokukonakona oimbuluma moshitukulwa shaMusati, omupedukomufala Zachariah Amakali okwa hokolola ta ti ovaholafani ava ohava di meumbo limwe.

Opolifi oya hokolola tai ti Mundjekela okwa kufa omupini ndele ta denge omuholike waye komutwe.

Shatilwe okwa xulifila meumbo, nokonima omulumenhu waye okwa faduka po.

Otaku hokololwa kutya ovashiinda ova kumwifwa koshikumungu eshi molwaashi Shatilwe naMundjekela  okwa li ve na ekwatafano liwa lopahole.

Opolifi oya hokolola kutya inapa lopotwa nale ovaholafani ava tava tanguna ile ve lidenga.

Ovaholafani otava kumaidwa opo va konge omakwafo kovaxungimwenyo ile kovafitaongalo ngeenge tava hepekwa koupyakadi wopamadilaadilo.

-fhamalwa@nepc.com.na