Auleria Wakudumo 

Omumati weedula 21 okwa xulifa eshi vati a tuwa nombele komulumenhu weedula 36 molwa obiila. 

Oshiningwanima eshi osha ningilwa poJika Jika Supermarket moKeetmanshoop, sha ningwa mEtinhe lwopo 21h30. 

Nakufya okwa tongololwa oye Max Plaatjies. 

Omupopiliko wopolifi, Deputy Commissioner Kauna Shikwambi okwa koleka oshiningwanima eshi. 

Otaku hokololwa Plaatjies vali tava tanguna nomufekelwa molwa obiila osho sha eta omufekelwa a nipule mo ombele ndele tatu Plaatjies. Plaatjies okweli fifida fiyo okoWoerman Brock oyo ili eemita e100 okudja apa a tuwilwa nombele ndele ta ongotele nokuxulifa. 

Omufekelwa okwa tulwa moipandeko ashike ombele oyo a longifa inai monika natango. 

Oshiningwanima shikwao, opolifi oya tula ovafekelwa vanhe moipandeko tava fekelelwa efyo lomumati weedula 18 oo a dengwa kovakwashiwana eshi vati a vaka oikutu komuleko. 

Oshiningwanima eshi osha ningilwa momukunda Oshondo mOutapi, Olomakaya lwopo 15h00. 

Otaku hokololwa ovafekelwa va hovela okupula nakuningwa oshihakanwa kombinga yoikutu oyo ya kana komuleko ndele tave mu denge. Konima vati ovemu shilila keumbo lavo oko va twikila okumudenga fiyo ta xulifa. 

Oshiningwanima shikwao, omulumenhu weedula 59 oo ali oshilyo shoRhino Trust team okweli tuwa a xulifa meendudu pokati kaBakondja naTobarab moSesfontein, Olomakaya lwopo 07h00. 

Nakufya okwa tongololwa oye Ludwig Ganaseb. 

Otaku hokololwa vati Ganaseb ali a dja muvakwao aka konga omakaya koBakondja ashike ina alukila vali kokamba yavo koTobarab Olomakaya olo. 

Ganaseb okweli tuwa a xulifa meendudu kopolifi Osoondaxa. 

-wakudumoauleria@gmail.com