Auleria Wakudumo
Oshiningwanima shikumwifa, osha lopotwa mOpuwo omo olutu lomulumenhu weedula 49 le lituwa momulamba la tetwa eenyala neemhadi.
Omupopiliko wopolifi Chief Inspector Elifas Kuwinga okwa holola kutya oshiningwanima osha holoka momukunda Otindjerese mOpuwo.
Nakufya okwa tongololwa oye Junie Hapuka oo a ningile oule woivike ivali ehe wetike.
Moshiningwanima shikwao shikumwifa, Clayton Lee Maze (28) okwa xulifa eshi e litwa nombele oikando ivali monhulo, shaashi vati a dimbulula kutya omukainhu oo ve li naye moihole oku na vali omakwatafano novalumenhu vamwe.
Manze vati okwa mona ouyelele oo mongodi yomukainhu waye oo e li yo ina yokaana kaye. Eshi osha ningwa Olomakaya lwopo 20h00 moshilandopangelo.
Moiningwanima ikwao ya yooloka ovalumenhu vahetatu, mwa kwatelwa ovakwashiwana vaAngola vavali ova xulifa eshi va fya momeva moiningwanima ihamano ya yooloka okudja oshivike sha dja ko.
Oshiningwanima shimwe osha ningwa momukunda Omufitu-wenghete mOutapi, omo omunamido 38 Tuli Christoph e lituwa a kaama kombada yomeva kovashiinda. Otaku hokololwa Christoph a lekela kutya ota i koundingosho efiku olo.
Eliakim Shaanika omukalimo womomukunda Olutsiidhi mOgongo weedula 39 naye okwa xulifa eshi a li ta kendabala okutauluka oshana shomeva. Oshiningwanima osha ningilwa momukunda Okathitu Kambanda mOkahao, sha ningwa Etinhe la dja ko. Natango, omukwashiwana waAngola, Kauendera Ruvandu weedula inadi didilikwa okwa xulifa pefimbo a li ta kendabala okutauluka omulamba popepi nolukanda Orutjandja mOpuwo, mOsoondaxa.
Oshiningwanima sha faafana, omulumenhu weedula 24 momukunda Otjiperongo moSesfontein, omufita woimuna nomukwashiwana waAngola okwa fya omeva pefimbo a li ta yoo mokandobe. Ofamili yaye kaya li ya shivifilwa.
Okwa hokololwa yoo, olutu lomulumenhu weedula 20 le lituwa la ninga nai momulamba kofaalama hai ifanwa Lekkerwater moKamdescha. Nakufya oye Vivien Hamaseb.
Oshiningwanima shikwao, olutu la Salomo Akudhenga (37) ole lituwa la kaama kombada yomeva Osoondaxa, momukunda Ondando moshitukulwa shaShikoto.
Otaku hokololwa omulumenhu a kana okudja Etitano eshi a monika ta nu omaongo molukanda Olumbongo.
Ongula yOsoondaxa, ovakwanedimo vaye ove litwa olutu laye la kaama mokandobe komeva popepi nolukanda opo a monika ta nu omaongo kwa li.
Sam Iita weedula 33 womukunda Epyalyiipundu mOndangwa vati okwe limangeleka konima yokupulwa kuina eeN$5 vati da kana meumbo.
Omanga omulumenhu omukwashiwana waAngola oo a li omunailonga womeumbo okwe lituwa e limangeleka momukunda Oshiha Shekwa mOutapi.
Nakufya okwa tongololwa oye Tobias Salongo.
Kakele kaSalongo ovalumenhu vavali, umwe umwe weedula 40 namukwao 36 ove limangeleka moiningwanima ya yooloka mOshana nomoKavango West. Opolifi oya koleka oiningwanima oyo aishe