Auleria Wakudumo
ONGWEDIVA – Omulumenhu weedula dihe shiivike natango okwa dengwa shi nyanyalifa kovakwashiwana oufiku wEtitano potundi 00h00 lwaapo eshi vati a nyeka okakadona ongodi. Mokufaduka po, ovakwashiwana ovemu taata ndele tave mu kwata.
Omufeekelwa okwa dengwa nomamanya, noimwati needibo okudja lwokoBay watch, ta findikilwa kovakwashiwana poshivelo shoshitaasi shopolifi mOngwediva, omo a ka lotokela opo a ye ‘konamwenyo’.
Nonande pali ovanhu vamwe ve na olukeno tava dengele opolifi opo i shakeneke ovakwashiwana i kufe ko omufeekelwa oo ali ta shisha ohonde eshi a dengwa, opolifi inayi tuma ko nande omupolifi umwe.
Mokufika popolifi, ovakwashiwana va handuka ova pula opolifi kutya oyali peni okudja nghee va kwata ombudi fiyo osheshi tava fiki poshitaasi.
“Vali omolwashike modoolopa muna oshivilo shomifyuululwakalo shaIUM ndele kamu na eetuwa dopolifi tadi li nyenge,” umwe womovakwashiwana ta pula a fufaeka. Ovakwashiwana ova ti otava kanifa eineekelo mopolifi osheshi ihai longo oilonga yavo.
Ovati ova loloka eembudi mOngwediva deli ninga odo ovanhona novanhu vahapu otava kufwa oinima yavo.
Omupedu Commissioner wopolifi yaShana Frederick Ndjadila okwa ti opolifi oi lile po okuamena oshiwana.
Ndjadila okwati ekwatafano pokati kopolifi noshiwana ola pumbiwa okukondjifa oibuluma.
Ta ti ita popile opolifi shaashi okwali ina okukwafela oshiwana. Okwa `ti oshinima shatya ngaho otashi tulwa meengundafana novakulunhu voitaasi yopolifi.