OSHAKATI – Omulumenhu weedula 30 okwa kwatwa po eshi vati a faduka po opolifi ndele otuwa yaye tai ke lidenga motaksi omo mwa monena ovanhu vatatu oiponga. 

Oshiningwanima osha ningwa Osoondaxa kEkuku mOshakati efimbo longula. 

Omukulunhu koshikondo shokukonakona oimbuluma moshitukulwa shaShana omupedukomufala Fredrik Ndjadila okwa hokolola ta ti omulumenhu woToyota okwa li a humbata oinima oyo hai di koAngola inai pitikilwa moNamibia. 

Ndjadila okwa ti omulumenhu okwa lombwelwa kopolifi opo a kanghameke otuwa yaye pomukunghulo wopate, ashike omufekelwa ou okwa faduka po ta shingilile. Mokufaduka po, otuwa yaye oye ke lidenga motaksi oyo kwa li tai di kOnhuno ya humbata ovanhu vatatu mwatelwa omukulupe weedula 70. 

Ovanhu vatatu ova mona oiponga, unene moipala eshi va tetwa komakenda. 

Pefimbo loshiponga omukulupe okwa li e li meni motaksi koshipundi shokonima, a tya oshipala shi yadi ohonde. 

Konima okwa tumbwa mo kovanailonga vouhaku ovo ve mu pa ekwafo lotete. 

Omukainhu nomulumenhu umwe okwa li va nangala mopate fiyo ohambulansa tai ya. 

Omufekelwa okwa tulwa moipandeko kopolifi ndele naye ta twalwa koshipangelo a ka ningilwe omakonakono opaunamiti. 

Opolifi oya ti konima eshi omufekelwa a pangwa okwa twalwa kodolongo nota holoka momhangu yamangestalata waShakati nena. 

Ota pangulilwa oshibofa shokushinga ehe na omukanda noshibofa shokueta oshiponga noshoyo eshi a faduka po opolifi. 

Oonakumona oiponga ova lekelwa mo moshipangelo. 

Opolifi oya kumaida ovashingi opo va xulife po okufaduka po opolifi ngeenge tava lombwela va fikame molwashi omunhu ota dulu okueta oshiponga. 

fhamalwa@nepc.com.na