Omukiintu gumwe okwa mangwaelwa omaako konima, eta mangwa komulungu omanga inaa kwatwa koonkondo kukuume ke komihole kwa li, momukunda Otjorute moshitopolwa shaMusati. Omukuluntu gwopolisi moshitopolwa shaMusati Titus Shikongo okwa ti, oshiningwanima shoka osha holoka Etitano lya zi ko po 01h00 yuusiku, momudhingoloko gwaRuacana.
Otaku hokololwa kutya omulumentu ngoka kwa li a ningi ethimbo kaayeli pamwe na yina yokanona ke, okwa li iiyakele mondunda ye uusiku a homata ekatana. Shikongo ta ti, okwa li athikile akwata yina yokanona ke komulungu nokumumanga noshilapi opo kaakuge, ye tamangele omaako ge konima, eta tsikile okulonga iilonga ye.
Otaku hokololwa kutya omumati ngoka okwa li a tsikile okudhenga kuume ke komiihole nomankawa.
Shikongo ta ti, anuwa okwa li e mu lombwele kutya ngele okwa popi shoka e mu longele ote mudhipaga.
Omulumentu ngoka okwa li a mangwa po kopolisi, eta itulilwa mokangulu eli moo ye awike omanga modholongo kwa li tamu tsininwa omolwa omukithi gwoCovid-19.
Shikongo ta hokolola ta ti, omulumentu ngoka okwa li a iyaaka mo moka ali a itulilwa, nokonima yethimbo okwa li a mangwa natango sho a kongwa kopolisi.
Ta ti, ngaashingeyi oku li momake gwopolisi nokwa patululilwa oshipotha oshitiyali sheiyako modholongo.
Omulumentu ngoka, omuAngola gwomimvo 24, omanga omukiintu ngoka alongelwa omiyonena, omimvo dhe inaadhi shiwika. Shikongo okwakumagidha oshigwana shi hulithepo okulongelathana omiyonena.
Ta ti, okulongela nenge okuthimika omuntu oshinima inashi za kehalo lye ondjo onene. Ta ti, kehe ngoka e li muupyakadhi nenge e li monkalo yoku mbandamekwa kaaholike yawo naya kambadhale okulopota kopolisi opo yi vule okukwathela omanga kuyele.
Ta ti, omawupyakadhi gatya ngaaka otaga holoka momagumbo, unene moshitopolwa shaMusati ihe itaga lopotiwa kopolisi, shoka hashi eta omadhipago.