Omukiintu gwomimvo 51 oku li monkalo ombwiinayi moshipangelo shaKahao sho anuwa a kwatwa koonkondo nokutetwa iilyo yuukiintu we komwana gwomimvo 19, a valwa kumumwayina.
Omukuluntu gwopolisi moshitopolwa Ismael Basson okwa ti oshiningwanima shoka osha holoka momukunda Uukwalumbe moshikandjohogololo shaKahao, mOmaandaha. Otaku hokolowa kutya omumati ngoka taku fekelwa a li kohi yiikolitha anuwa okwa li a adha yinagona a lala popepi nolukanda mpoka pe na oondunda dhomanwino, e te mu hili sigo ya yi kokule. Basson okwa hokolola kutya omulumentu ngoka anuwa okwa li a hula yinagona koonkondo e te mu kwata koonkondo noku mu tetagula kiilyo yuukiintu we.
Ta ti, omulumentu ngoka ngashiingeyi e li miipandeko anuwa iha zi pamwe nanakulongelwa omiyonena.
Moshiningwanima shimwe sha faathana omulumentu gwomimvo 37 okwa mangwa po kopolisi moshitopolwa shaMusati sho anuwa a kwata koonkondo okanona komimvo 16. Basson okwa ti oshiningwanima shoka osha holoka Etiyali komukunda Okapya moshikandjohogololo Oshikuku.
Otaku hokololwa kutya nakufekelwa okwa li i ithana okanona hoka ke na uulema mondunda ye yokulala, e te ka longele omiyonena. Ta ti, omakwatokoonkondo oga ninga okangalo moshitopolwa shaMusati, shoka tashi yemateke.
Basson okwa popi kutya okuza esiku lyotango lyaJanuali nuumvo sigo Etiyali lyoshiwike shika okwa lopotwa omakwatokoonkondo ge li gatano, kokutya kehe moshiwike otamu lopotwa ekwatokoonkondo.
Oshiwike sha zi ko ngoloneya gwoshitopolwa shaMusati Erginus Endjala okwa holola euvonayi omolwiipotha yomahepeko gomomagumbo tayi indjipala moshitopolwa. “Omahepeko momagumbo osho wo omadhipago oga konekwa taga indjipala, nohaga holoka unene moshitopolwa shaMusati,” ta ti ngaaka.
Endjala okwa ti, omahepeko taga holoka momagumbo ongaashi omadhipago, omakwato koonkondo, omahepeko gokudhengwa, omakwatombyambyona osho wo omahokanitho gaanona aashona.
Ta gwedha po kutya omahepeko otaga yonagula oonkalamwenyo dhaantu, unene aanona aashona taya kwatwa koonkondo nokuyonenwa oosikola.
“Oshitopolwa shetu shaMusati osho shimwe sha ndhindhilikwa shi na iipotha yi li pombanda yaantu ya ningilwa notaya ningilwa omahepeko gomomagumbo,” ta ti ngaaka. Ta kumagidha kutya oshigwana nashi mange uukuni kumwe opo shi kandule po omahepeko momagumbo.