Auleria Wakudumo
Ingashipola Lucas oye umwe womovanyasha eli pomido dishona a tumbalekwa noghatu youndokotola okudja kondje yoshilongo koNigeria.
Ena ashike eedula 25, Lucas okwa mona etumbaleko eli okudja koshiputudilo shopombada hashi ifanwa oGlobal Open Nation moNigeria. Lucas okwa pewa etumbaleko eli mewiliko lovanyasha hano oYouth Civic Leadership and Education.
Lucas okwa pewa etumbaleko eli pehovelo lomudo muFebruali. Omunyasha ou okwa pewa efimaneko eli okudimbuluka oilonga oyo a longa okuyambula po ovanyasha, oufemba nemanguluko lovanyasha moAfrica oshoyo ewiliko laye liwa okukwatela kumwe ovanyasha okudja koilongo ya yooloka muAfrika.
Oule weedula nhee da pita, Lucas okwa kala ta dilongele noikumungu yovanyasha moNamibia oshoyo muAfrica. Ekufombinga laye olemu kufa moipundi yaNamibia fiyo okondje yoshilongo, mwa kwatelwa oSADC Youth Empowermebnt Summit moTanzania oshoyo oGlobal Democracy Forum moNairobi, Kenya.
“Onda hala ngeenge ohandi dimbulukwa, di dimbulukwe onga omunhu ou a longifa efimbo laye okuamena onakudiwa yaNamibia handi shi ningi okupitila mokuxwaxwameka ovanyasha novaleli vokomongula,” Lucas ta holola ngaho.
MoTanzania, Lucas okwa denga omufindo nghene shili sha fimana opo ovanyasha va kufe ombinga momahoololo, tava longifa outeknologi, omanga moKenya a yandja oshipopiwa kombinga youfemba wovanyasha nemanguluko. Oshipopiwa shaLucas oshali sha shambula ovaleli vahapu okudja koilongo ya yooloka mounyuni.
Lucas okwa holola kutya ehalo lokulela muye ola tameka nale okudja eshi ali munini.
“Onda tameka okukala handi yandje omayele okudja mondodo ongiheyali. Ka ndali ndishishi ngeenge okupopya kwange otaku twala nge kokule ngaashi kwa tumbalikifange ngaha,” Lucas ta holola.
Ka kele kokupopya netumbaleko eli a mona, Lucas oha longo onga omukulunhuwiliki woYouth Alliance for Leadership noDevelopment muAfrica (Yalda). Lucas okuli yo omunashipundi moAfrican Youth Council Board.
Lucas okwapewaomakopi moilonga yaye kodje yoshilongo ngaashi ekopi loYouLead Africa International Youth olo a vena mo2019.
Lucas okwa itavela kutya keshe oupyakadi otau dulu okukandulwa po. Eshi ohashi dulika ashike ngeenge pena vati elelo newiliko olo la tula eemhumbwe doshiwana komutima.
Lucas okwa twa ovanyasha omukumo op ova konge owino moinima oyo tai va kwafa va ye komesho mopaife.
“Etumbaleko eli kali fi ashike lange,” Lucas ta ti. Etumbaleko eli ola nhuninwa omunyasha keshe oo a hala okuyambula po onghalamwenyo yaye oshoyo okuxwepopaleka onghalo muAfrica,” Lucas ta holola.
-wakudumoauleria@gmail.com