Omulumenhu weedula 25 okwa xulifa, omanga kaume kaye a mona oshiponga eshi va wilwa kekuma letungo olo kwali tava ngumuna po. 

Oshiningwanima osha ningwa Etitatu kendiki loRamatex koWindhoek onghela, efimbo longula. 

Nakufya okwa tongolwa oye Pius Petrus weedula 25 omukalimo womOtjomuise. 

Senior Inspector Hilma Amutenya ta longele koshikondo shokuyandjaneka ouyelele keembelewa da kula dopolifi okwa hokolola ta ti ovalumenhu mukwao okwa mona oshiponga komadi omanga umwe okwa endelela okufaduka po. 

Opolifi oya hokolola tai ti Petrus opo a xulifila ponhele opo. 

Ota ku hokololwa kutya ovanhu ava okwa li ve li moilonga yokuteya po ekuma nelalakano lokulimonena oshimaliwa. Nakuwilwa kekuma komadi okwa twalwa koshipangelo opo aka mone omayakulo opaunamiti. Oshiwana osha kumaidwa opo shi kale sha kotoka ngeenge tashi tungu ile tashi dengulula po omakuma neebashu molwashi ovanhu ova ninga oihakanwa yokumonifwa oshiponga. fhamalwa@nepc.com.na