Auleria Wakudumo
Omumati weedula 16 Omukwashiwana waAngola okwa xulifa sha dja eshi a xwikwa kolusheno.
Oshiningwanima osha ningilwa modoolopa yaMuthiya moshitukulwa shaShikoto, sha ningwa Etitatu lwopo 14h30.
Omupopiliko wopolifi moshitukulwa shaShikoto, Chief Inspector Ellen Nehale okwa koleka oshiningwanima eshi.
Otaku hokololwa nakufya a li omufita weengobe komukunda Okakoko popepi nOmuthiya.
Nakufya okwa shiivika nawa oye Tate-tai. Tate-tai okwa yambukile pOndjiva moAngola.
Otaku hokololwa Tate-tai a ka londa kopaala yolusheno manga ta lifa oimuna ndele ta xwikwa kolusheno nokuxulifila poshiningwanima.
“Tate-tai okwe ya okulituwa komufita weengobe umwe oo a hanga a kanyatela kopaala yolusheno. Okwa shiivifila opolifi oshiningwanima,” Nehale ta ti.
Nehale okwa ti opolifi oya shivifila ovanailonga vaNored ovo ve ya okumukufa ko kopaala yolusheno.
Omupopi l iko wehangano loNored ,Simon Lukas okwa koleka oshiningwanima eshi.
“Ohatu shivifile ovakwashiwana aveshe kutya Nored okwa shivifilwa oshiningwanima sholusheno osho sha twaalela omwenyo womukwashiwana waAngola Etivali popepi nodoolopa yaMuthiya,” Lukas ta ti.
Lukas okwa ti nakuningwa oshihakanwa okwa xwika eshi a londa opaala yo22kV yolusheno.
Natango, Nored ota kunghilile oshiwana shi likaleke kokule noikwamalusheno i li momidingonoko ngaashi eepaala dolusheno, oukefa volusheno naikwao osheshi oya nyika oshiponga.
Oshivike sha dja ko, Nored okwa li a ninga omutumba nehangano la shiya ko mokuungaunga noikwamalusheno moshilongo loElectricity Control Board.
Omahangano aa okwa li a shakena nelalakano lokukundafana kombinga yoshikumungu shovanhu tava fi nokulemanekwa kolusheno.
Omunambelewawiliki ta kwafele kehangano lolusheno loNored Toivo Shovaleka okwa ti ova taalela eshongo linene lovakwashiwana tava kwata eengodi dolusheno ngeenge da wa po komidingonoko davo.
Shovaleka okwa ti ova tameka okuyandja ehongo nouyelele koshiwana opo shiha kwate vali eengodi dolusheno molwaashi osha nyika oshiponga.
Oshiwana osha kumaidwa shi lopotele opolifi ile ovanailonga vaNored ngeenge kwa monika eengodi dolusheno de lidenga po.
“Otwa yandja eenomola deengodi koshiwana opo shi dule okutuma omatumwalaka efimbo keshe ngeenge va mona eepala ile eengodi dolusheno de lidenga po, “Shovaleka ta ti.
Okwa lopotwa oiponga paife ili 18 ya etwa kolusheno, komahangano a yooloka olusheno e li moshilongo ashike Nored oye a lopota omivalu dihapu doiponga nomafyo ya etwa kolusheno mwa kwatelwa ovanailonga vaye. Ovanhu vahetatu ova fya, navahamano ova lemana moiponga yolusheno ya ningwa okudja omudo wa dja ko fiyo oneudo.
-wakudumoauleria@gmail.com