Auleria Wakudumo 

Omukainhu weedula 34, omukalimo womOnamutenya moshitukulwa shaShikoto okwa xulifa efyo likumwifa eshi vati e lituwa komulumenhu waye e li moshipundi shobesa a xulifa. 

Otaku hokololwa omukainhu ou a hangwa e li meteelelo leemwedi nhatu, va kala mohole nomunamido 36 oule woivike ivali. Pefimbo loshiningwanima vati ova hangwa va yuka keumbo lomumati kOlungalunga. 

Omukulunhu koshikondo shokukonakona oimbuluma moshitukulwa shaShana, Deputy Commissioner Frederick Ndjadila okwa koleka oshiningwanima eshi. Ndjadila okwa holola ta ti obesa oya dama momeva lwopo 04h00 yokeengula, noye ya okukufwa mo po08h20. 

“Ovashiinda ova kendabala okuundula mo otuwa momeva ashike inave shi pondola. Konima, ova ka ifana eetuwa mbali di nane mo obesa ashike nado oda dama,” Ndjadila ta ti. 

Ndjadila okwa weda po ta ti obesa neetuwa mbali ode ya okunanwa mo keloli ongula. 

Pefimbo vati ovanhu tava kendabala okukufa mo obesa momeva, omukainhu okwa li a kala e li omutumba mobesa oye aeke. 

“Eshi obesa ya dja momeva, omulumenhu okwa didilika kutya omukainhu ita popi, ye ita nyamukula eendjovo daye,” Ndjadila ta ti. 

Okwa ifana vati ava vali tava undula obesa va hangika tava ii nale opo ve mu kwafe ashike omukainhu ova hanga a xulifa. 

Otaku feekelwa omukainhu a xulifa nale manga obesa tai undulwa. 

Ndjadila okwa ti omukainhu okwa popya nakaume kaye kopaihole lwaxuuninwa eshi e mu pula a ka talaleke ashike vati okwa lombwelwa a talalekele motuwa. 

Omukainhu otaku hokololwa a li vati meteelelo leemwedi nhatu nokwa li e na oughundi wohonde ya londa. 

-wakudumoauleria@gmail.com