Lahja Nashuuta

Ombelewa yomukalelipo gwoshilongo shaGermany moNamibia oya tseyitha kutya otayi ka gandja uunongo wokufikila iitenda kaangundjuka moshitopolwa shaMusati oshiwike tashi ya, aagundjuka ye li 20 oya tegelewa ya ka kuthe ombinga momadhewulo ngaka.

Pamushangwa okuzilila kombelewa yomukalelipo gwaGermany, omadhewulo ngaka otaga ningilwa poNakayale Vocational Training Centre  okuza momasiku 15 sigo 19 ga Desemba nuumvo. 

Omupopiliko nomuunganeki gomakwathelo ngaka Christof Lammen  okwa li a lombwele oshi kundaneki sho Kundana  kutya elalakano lyomadhewulo ngaka oku gandja omauyelele nuunongo kaagundjuka mbono ye na ohokwe okutota po ongeshefa mokufikila.

Ta tsikile ko wo kutya omadhewulo ngaka otaga lalakanene okukwathela aagundjuka okweeta po oompito dhiilonga nosho wo okuyambidhidha mokutunga nokuhumitha oshilongo komeho.

Ombelewa yomukalelipo gwaGermany oya ti yo otayi ka gandja omayambidhidho goshimaliwa nosho wo iilongithwa yokufikila.