Paulina Ndalikokule
Ehangano lyoProject Hope Namibia olya gandja omayakulo gomakonaakono noshowo gelongo kombiya yoHIV/Aids kaagundjuka yoomvula 18-24 yeli 360, moshikonga shoReach Namibia sha li moWindhoek oshiwike shazako.
Aagundjuka oya pewa uuyelele nkene ye na oku kwiigamena kombuto yoHIV, oku gambeka oluvalo inalu longekidhwa oshowo okwi igamena komahepeko guukakwashikekokantu nankene ye na okumona omayakulo ngoka.
Omukuluntu gopoloyeka ndjoka Bernadette Harases okwa ti oya li ya nyanyukwa oku mona aagundjuka oyendji yaholoka noku konga omakwatho kombinga yuundjolowele wawo.
“Oshilalakanenwa shetu oku pa aanyasha oonkondo nuunongo osho wo kehe shoka taya pumbwa oku kalekapo uundjolowele opo ya humithe oshilongo komeho,” a ti ngaaka.
Ta ti Reach Namibia ota gandja omayakulo ngoka miitopolwa ngaashi Khomas, Ohangwena, Omusati, Oshana, Oshikoto, Zambezi, Kavango West noko Kavango East. Ta gwedha po kutya mwekwatathano niilyo yawo otaya tsikile noku kwashilipalekwa kutya aantu taya hupu nuudhigu yeli kohi yoomvula 24 naamboka taye ya tonatele ohaya mono omayakulo gwopaundjolowele.
Emilie Handunge gumwe gomwaamboka yakutha ombinga okwa ti okwa ilongo nkene ena oku isila oshimpwiyu nokwiigamena komilale inadhi gamenwa oshowo oku ngambeka oluvalo.
“Onda etelele aanona yandje yiilonge kombinga yomukithi gwoHIV. Onga aakuluntu osha simana oku hwahwameka aanona yetu opo ya konge uuyelele kombinga yuundjolowele unene tuu shinasha niivalitho, tu popye nayo pehala lyoku yi tala ko nga iidhila,” ta ti ngaaka.
Omunyasha Frieda Swartbooi okwa ti okwa nyanyukwa oku mona omayakulo ngoka nokutseya kutya opena omauwanawa ogendji tavulu okumona kehangano ndyoka. “Onda tseya kutya ohaya gandja wo omalongo gopashimaliwa osho wo elongo kiiputudhilo yopaungomba moka tandi vulu okwiimonenamo onzapo yuulongelwe,” ta ti.