Opolisi yaNamibia oya kumagidha oshigwana shi hulithe po okukanwetha omahooli taga zi koAngola haga landithwa shaali paveta koongamba dhaNambia nAngola.
Tayi ti, oshanika oshiponga oshoka ohaya yugwa iinima yawo nokumonithwa iiponga konima ya landa omahooli.
Omukuluntu gwopolisi moshitopolwa shaHangwena Ottilie Kashuupulwa okwa koleke kutya opolisi oyi shi shi kutya Aanamibia ohaya yugwa iinima yawo nokumonithwa iiponga uuna taya landa omahooli ngoka taga iithanwa “Ngungula”.
“Aantu mboka haya ponokelwa kAaangola taya landitha omahooli, ihaya lopota iiningwanima mbyoka kopolisi oshoka oye shi shi kutya shoka taya ningi kashi li mondjila,” ta popi ngaaka.
Kashuupulwa okwa ti, omapopyo ngoka kutya opolisi ohayi kala ya tala ashike aantu mboka taya landitha ya manguluka kadhi shi dhoshili, opolisi kehe siku otayi kwata ko omandini uuna ya adha taga landithwa moNamibia.
Ta ti, opolisi ihayi vulu ashike oku ya ninga sha uuna taya landithile moshilongo shawo. “Onda hala okuyelitha kutya Aaangola mboka ihaya kala mOshikango ihe oye li kooha dhondhalate ndjoka ya teta po, pokati kaNamibia naAngola,” ta popi ngaaka.
Kashuupulwa okwa kumagidha Aanamibia ya hulithe po okulanda omahooli miihwa, ngoka a hala omahooli na ka lande meni moAngola, pootenga.
Kamati Samuel omuhingi gotakisi mOshakati okwa ti, okwa hahalwa nekatana kokwaako ta kuthwa ongodhi ye yopeke niimaliwa a li e na kaamati mboka taya landitha ngungula kOshikango.
“Onda li nda landa endini lyomahooli, sho nda gandja iimaliwa kugumwe onda mono ashike nda dhingolokwa kaamati ya thika pomulongo ya tya omakatana yamwe ye na ookapi,” ta hokolola ngaaka.
Samuel okwa ti okwa li a hahalwa kokwaako sho ta kondjele iimaliwa nongodhi ye. Ta ti aalumentu mboka oya li ya tondokele moAngola.
Thomas Hilarius okwa ti onkalo oya nyayika kOshikango. “Onda kuthilwa ko ongodhi yandje konima ashike nda mana okunwetha, nda kuthilwa oombele,” ta popi ngaaka.
Ta ti, shoka hashi ya fala ko ombiliha yomahooli, omahooli moNamibia oge na ondilo. Omulandithi gwomomapandaanda kOshikango edhina lye lyi shiwike kuKundana okwa ti opolisi yaNamibia ohayi kala ashike ya tala aaAngola taya landitha ngungula.
“Omasiku gamwe ashike haya kala taya patolola ihe olundji ihaya ningi sha,’’ ta po pi ngaaka. Ta gwedha ko kutya aamati mboka oyi ininga aafuthi, ohaya yugu ookasitoma dhawo.
“Kehe siku ohatu kala twa tala iinyandwa yAanamibia taya yugwa nokudhengagulwa konima ya nwetha,’’ ta hokolola ngaaka.
Ta ti, mboka inaya endela we ongeshefa ihe oya ninga aafuthi.
Okuza omimvo dha piti ooyene yomahooli moNamibia oya kala nokunyenyeta okupitila miikundaneki ya yooloka nkene omahooli ga ngungula taga dhipaga po oongeshefa dhawo.
Taya ti, aakalimo yokiitopolwa yokonooli oyendji pootenga dhomahooli kaye shi po we oshoka oya landula ashike mpoka tapu landithwa ngungula.
Peter Kanu Amadhila, omunashipundi gwehangano lyoNaloba okwa li omumvo gwa yi okwa li a pula epangelo lyaNamibia opo lyi ye po nonkatu opo uupyakadhi womahooli gaNgungula ga hule okuya moNamibia shaa li paveta.
“Oongeshefa dhetu mba tu na oombapila dhokushingitha omahooli moshilongo odha shuna monima omolwangungula,” ta nyenyeta ngaaka.
Ta ti, Aanamibia ohaya ka tala ashike ngungula ya manguluka.
Ta gwedha po kutya omahooli gamwe moNamibia oga pata oshoka kape na ookasitoma. Kakukutu komatanga Joseph Shikongo okwa kala nokukunkilila oshigwina shi hulithe po okulanditha omahooli taga zi poshishiindalongo Angola.
“Opolisi yaNamibia oya ilogekidha ethimbo alihe okumanga po kehe ngoka itaa landula ooveta nomalandulathano gopolisi, onkene otandi iilndile
oshigwana shi longele kumwe nopolisi okulwiitha shaashoka shaa li mondjila,’’ ta indile ngaaka.
-vkaapanda@nepc.com.na