ONANDJOKWE – Ovakainhu ve li momateelelo kewalanda koshipangelo shaNandjokwe otava nyenyeta tava ti ohava nangalele ondjala ngeenge taku lokwa molwashi ohava telekele pomafiya hapa talama omeva.
Ova hokolola tava ti unene tuu ngeenge efiku olo ku na omudimbi wodula oshi li eshongo linene molwashi ihava dulu okutema pomafiya.
Ova ti kutya ngeenge efiku olo kuhe na odula ohava dulu okuteleka eendja davo ashike ohava telekele momutenya molwashi ka pena etala lomudimo pomafiwa.
Ewalanda onhele oyo hai kala ovakainhu ve li momateelelo hava ka teelela ngeenge ve li popepi nokupulumuna.
Ewalanda ohali kwafele unene ovakainhu hava di komikunda dokokule shaashi ngeenge tava fetwa iha va ende vali oshinano shile molwashi ola tungwa li li popepi noshipangelo.
Onhele yewalanda oya tungwa pefimbo oshipangelo shaNandjokwe sha totwa po konima yemanguluko.
Ndahambelela Dimbulukeni a dile komukunda Okongo okwa hokolola ta ti onghalo yokukala kEwalanda kai pu molwashi ova taalela omashongo aahapu.
“Oikuni yetu yokutemifa ohai lokwa kodula molwaashi katu na apa hatu i tula,” ta ti.
Okwa weda po ta ti ngeenge pomafiya pa talama omeva ohava tembukile ponhele imwepo ndele tava diki po omafiya opo va dule okuteleka. Tavita Wilbard a dile koUukwiyuushona okwa hokolola ta ti ohava lika keemwe shaashi kave na eenete dokukelela eemwe. “Ohatu nangala keembete di na omatelashe a pomboka nokutuwa koitenda yeembete. Omunhu mongula eshi to penduka oto vele meemhati,” ta hokolola.
Ovakainhu ava ova hokolola tava ti ova teelela yoo vali eshongo loombishi tava li mo oivelelwa yavo noshoyo okulyatauka keembete davo ngeenge va kofa.
“Otwa didilika oumbudi tau dana onghandangala kEwalanda omo ovakainhu vakwetu hava va ke po oikutu, omilambo noshoyo oikuni yetu,” Lusia Nghishiko ta hokolola.
Eshi a kwatafana naKundana omulukunhuwiliki woshipangelo shaNandjokwe Dr. Siraji Saad okwa yelifa ta ti kEwalanda okwa tungwa etala lomudile lokutelekela ashike inali patuluka manga pambelewa.
Etala ola tungwa kehangano loJodary Fishing CC kongushu yoshimaliwa eeN$250 000 omudo wa djako.
Saad okwa ti ngeenge etala ola patululwa pambelewa nena otali dulu okulongifwa.
“Ombelewa yange pamwe nomukulunhuwiliki wouhaku moshitukulwa oye lipyakadila nokuninga omalongekido okupatulula etala,” ta ti.
Saad okwa ti kEwalanda okwa li kwa tulwa eenete deemwe ashike ovakainhu ngeenge tava shuna komaumbo ohava vake po eenete ndele tava tula koshi yeendjato.
Omudo 2022 Omupresidente Nangolo Mbumba okwa yandja omatalashe kEwalanda laNandjokwe konima lesha onghundana moshifo shoNew Era kombinga yovakainhu ve li momateelelo tava nangala pedu.
Saad okwa yelifa ta ti omatalashe oo a yandjwa kuMbumba okwa twalwa keeshala molwashi oku na omhumbwe yovanaudu va pumwa omatalashe.
“Keesaala natango otwa landela ko omatalashe molwaashi kakwa li a wanena ovanaudu,” ta ti.