Okwa ndhindhilikwa aantu oyendji taya tembukile koondoolopa taya zi kuushayi omolwomatompelo ga yooloka, iilonga, elongo eputuko nosho tuu.
Ndhoka odha popiwa esiku kwa li taku ningwa oonkundathana dhomatalululo gomilandu dhokuyambula po nokuhwepopaleka onkalo yokuushayi, dha ningilwa koombelewa oonene dhopashitopolwa mOshana Etine.
Omukuluntuwiliki muuministeli womayambulepo goondoolopa niitopolwa yokomikunda Titus Endjala okwa ti aantu ohaya zi kuushayi taya yi koondoolopa ya ka konge uuhupilo osho wo oompito dhiilongo nomayakulo galwe.
“Ndyoka olyo etempelo limwe twa hala okukundathana nkene tu na okuyumbula po nokuhwepopaleka onkalo yokuushayi okuyanda omatembuko.
“Komikunda oko hoka haku ndulukwa iikulya okuza momapya shoka sha simana,” ta fatulula ngaaka.
Omukuluntu gomathaneko gomayambulepo muuministeli womayambulepo goondoolopa nuushayi Lucresia Frans, okwa fatulula kutya nonando kuushayi kwa kala ku na omwaalu gwaantu oyendji shi vulithe koondoolopa, nena omwaalu ogu thike pamwe.
“Okwa ndhindhilikwa kutya oopelesenda omi-50 dhaantu odhi li kuushayi, osho wo oopelesenda omi-50 dhi li koondoolopa, omwaalu ngoka gu uka pombanda,” ta popi ngaaka.
Frans okwa ti shoka otashi ulike kutya monakuyiwa komikunda itaku ka kala we aantu oyendji, shoka tashi etwa kokwaaputuka.
Ta ti, aantu ohaya thigi po omikunda yu uka koondoolopa omolwokwaa na iilonga, taya ka konga shoka taya vulu okunyangadhala nasho.
“Ngashiingeyi okwaa na iilonga kuushayi okwa thikama poopelesenda 41.
Shika otashi kandulwa po ashike uuna kuushayi taku humithwa komeho opo ku vule okukandula po omaupyakadhi gokwaa na iilonga osho wo okufala omayakulo popepi,” Frans a fatulula ngaaka.
Omunambelewa moombelewa oonene dhoshitopolwa shOhangwena Rosina Negonga okwa ti aantu oyendji ohaya tembukile koondoolopa oshoka oku na oompito odhindji tadhi vulu okulundulula oonkalamwenyo dhawo.
“Omayakulo ogendji oge li koondoolopa. Ngele komikunda okwa falwa omayakulo taga pumbiwa, otashi vulu okuhwepopaleka etembu lyaantu,” ta popi ngaaka.
Aaleli yiitopolwa niikandjohogololo osho wo aanambelewa aakuluntu okuza kiitopolwa Oshana, Oshikoto, Omusati osho wo Ohangwena oya kutha ombinga moonkundathana ndhika.
Omunambelewa gomelelo lyondoolopa yOshakati Simon Shilongo okwa ti, nonando taku popiwa eputuko, naku talike ngaa nawa oshoka omikunda odhindji otadhi hanagulwa po tadhi tulwa pomuthika gopandoolopa, masiku omikunda otadhi ka dhima po.
-vkaapanda@nepc.com.na