OSHAKATI – Aanamukunda kOnawa otaya nyenyeta kutya inaya manguluka we omolwoombudhi tadhi teyagula omagumbo nokuyugwa iinima yawo.
Taya ti uupyakadhi mboka owa pimbile sho aantu oyendji ya li ya tembudhilwa ko okuza komalukanda ga yooloka mOshakati omimvo dha piti.
Omumvo gwa yi okwa li ya tulilwa po osasiona yopolisi ihe anuwa kashi ivule ihe onkene otaya indile ya opolisi yi kale tayi ningi opatolola ethimbo kehe.
Aantu ya thika 3 000 oya li ya tembudhilwa kOnawa okuza komalukanda Oshoopala, Kalaula osho wo Oshimbangu nelalakano lyokutula omalukanda pehala limwe.
Olukanda Oshoopala nedhina lya tseyika nawa Ankambya olya kala lya ndhindhilikilwa lya edhilila unene oombudhi, naasho lya tembudhwa olya faalele anuwa ombudhi kOnawa. Aakalimo yamwe yomwaamboka ya tembudhilwa osho wo mboka ya adhika kOnawa inaya nyanyukilwa etembudho omolwaafuthi haya longele aantu omiyonena kolukanda hoka osho wo omagumbo momindhingoloko.
Aakalimo yomomikunda dhi li popepi osho wo omalukanda ngaashi Oneshila nOkandjengedi nayo otaya nyenyeta ya taalela uupyakadhi wa tya ngaaka.
“Opo nda valelwa mpaka ihe inandi uva nale egumbo lyetu lya teywa, ihe konina olukanda ndoka lwa tembudhilwa mpoka, otatu mono iihuna,” Shilongo Mateus ta nyenyeta ngaaka.
Martin Shafoihuna gwomolukanda Oneshila naye okwa ti omagumbo gawo oga kala taga teywa koombudhi nkene olukanda ndoka lwe ya po.
“Onda kala mo oomvula dha pita 25, ihe kakwa li handi uvu aantu taya kondekelwa momagumbo, shapo ongele wa thigi oshinima shoye pondje kaape na aantu opo to adha sha yakwa po,” ta hokolola ngaaka.
Ta ti, oondunda dhomanwino otadhi teyagulwa omanga aantu ya kotha, ihe uupyakadhi awuhe mboka otau ziilile kolukanda Onawa.
Aakalimo yomolukanda Onawa otaya nyenyeta kutya otaya yugwa iinima yawo osho wo omagumbo gawo taga iteyelwa kaafuthi esiku kehe.
Taya ti, nonando etompelo lyokutembudhilwa kOnawa oye li uvite ko, osha pimbila.
“Okasasiona kopolisi hoka ka tulwa po kashi ivule, oombudhi odha tsikila ashike,” ta ti ngaaka. Mboka ya li ya tembudhilwa ko tango, oya kala ye li ompinge okutulwa popepi naamboka ya tembudhwa okuza kOshoopala oshoka anuwa oyendji yomuyo aafuthi.
Nangombe Matias okwa ti oya kala ethimbo taya indile ya gamenwe oshoka inaya manguluka molwaafuthi mboka ye ya popepi.
Ta ti okwa li e shi pamwe ngele egameno lyopolisi lye ya popepi onkalo otayi hwepopala.
“Omalukanda paife oga ya mumwe, onkene otatu indile etanga lyegameno natango lyi tale ko kombinga yegameno opo ku tamekwe opatolola unene ethimbo lyuusiku oshoka oonkalamwenyo dhetu odhi li moshiponga,” ta popi ngaaka.
Matias ta ti, aantu oyendji otaya nyenyeta kutya oye li muupyakadhi waafuthi.
Omukuluntu melelo lyondoolopa lyOshakati Timoteus Namwandi okwa ti, oye uvite ko omanyenyeto goshigwana, ihe oya tembudhile aantu kombinga hoka omolwomatompelo gongushu.
“Elalakano olyokuhumitha komeho nokuyambula po ondoolopa yetu, okugandja omahala kaakalimo yetu, yo ya kale momahala ga yela noge na omayakulo agehe ya pumbwa,” ta ti ngaaka.