Omukiintu gwomimvo 42, Johanna Nangombe  ngoka a li a pula omakwatho moshigwana konima ye naanona ya tidhwa megumbo, ota pandula oshigwana sho she mu yambidhidha nomakwatho gotango.  

“Onda kwathelwa niikulya, iilya osho wo omakwatho ga gwedhwa po ngaashi iimaliwa. Natango onda pulwa ndi kwathelwe ehala okuza kooyene yoshilongo opo ndi vule okuyambidhidhwa kehangano lyimwe lya dhengele ndje, ndyoka tandi ke li tumbula uuna nda yamukulwa,’’ ta popi ngaaka.

Ta ti, okuuvite nawa, ke na iitya nomatumbulo onkene ota pandula aanamutimahenda ayehe mboka ye mu yambidhidha.

Ta gwedha po kutya, shoka a yambidhidhwa nasho otashi ya kwathele sigo omomasiku ngoka taya ka shuna kompangu momasiku 17 gaApilili nuumvo. 

Nangombe omwedhi gwa yi okwa li a hokolola komalungula nkene ye naanona ye li kohi yomimvo ya tidhwa megumbo komusamane gwe ngoka anuwa a ka kalela aakiintu yalwe koAngola.

Ye, nomusamane anuwa oya hokanene pambelewa momumvo 2008, noye na aanona aanona yane pamwe, nayamwe yatatu mboka taya tekula.

Shika osha ningwa sho omusamane a pewa epitiko kompangu, nokulongitha opolisi okutidha omukulukadhi megumbo.

Nangombe noyana ngashingeyi ohaya zi megumbo lyamushiinda moka ya pewa ondunda yomwiidhi ya siikilwa niinayilona kombinga, naashika oye wete shi li hwepo okuyelekanitha nopekota lyomuti mpoka ya li ya tidhilwa.

Nangombe okwa ti, omusamane gwe gwomimvo 56 ngoka edhina lye lyi shiwike kuKundana okwe ya tidha konima sho a lundile Nangombe kutya oha yi miihulo nomulumentu gulwe.  Nangombe ota fekele kutya omusamane gwe okwe ya po nomahokololo giifundja oshoka okwa hala ya ze mo megumbo e li landithe po ngaashi a kala te shi popi, nonando egumbo ndyoka oye li kokola po ayehe. 

Ta ti, omusamane okwa ningi omimvo e ya thiga po e li koAngola hoka e na ko omagumbo naakulukadhi yaali oshowo aanona.

“Onda kala megumbo moka omimvo dha pita puhetatu a thiga ndje po a ya koAngola, ihe nena ondi li mepandaanda, omanga egumbo kali na omuntu, ye a shuna komagumbo ge koAngola,’’ ta popi nomahodhi taga tondoka.

Ta ti, okwa ningi omimvo ta longo epya lye, ihe nena otaya si ondjala omanga oshoka ke na uuthemba okuya mo megumbo a ka tale mo iilya mbyoka a longa.

Oondjuhwa niingulu ye oya sa kondjala, omanga iilya mbyoka ya li mepya ya lika po kiimuna.  – vkaapanda@nepc.com.na