WINDHOEK- Onkundana ombwaanawa okuza moshilandopangelo oondjika kutya aakalimo yomomudhingoloko muka otaya ka eta po oshituthi shawo shotango shopamuthigululwakalo.
Etseyitho lyoshiindingili shika okwa li lya ningwa ongulohi yEtiyali lyoshiwike shika, pehala lyokunwa nokulya epe lyoTornado, moka aalongekidhi ya li ya tseyitha kutya oshituthi shotango shopamuthigululwakalo shedhina ‘Windhoek Annual Cultural Festival’ otashi ka ningilwa moshilando muJuni okuza momasiku 26 sigo 30.
Elalakano lyoshituthi shika ongaashi naana omukalondjiigilile, okuulika nokutseyitha oonkuluhedhi nomithigululwakalo dhomoshilongo.
Ashike omweetipo gwoshituthi shika Sylvester Shapwa okwa ti elalakano enene okutaandelitha aanangeshefa aashona opo ya vule oku eta po oongeshefa dhawo yoyene, yo ya vule okwiilongela yoyene tashi pititle miinima mbyoka yopamuthigululwakalo.
Kakele kwaashoka, Shapwa okwa gwedha po ta ti oya hala ishewe okutotha mo iitalenti iishona tashi pitile momathigathano ogendji ga tengenekwa taga ka dhana onkandangala poshituthi osho tuu shika.
“Otwa hala ishewe okulonga Aanamibia kombinga yomithigulwakalo adhihe moshilongo, tashi pitile miinyangadhalwa oyindji mbyoka tatu ka tseyitha komasiku gokomeho,” Shapwa ta ti ngaaka.
Shapwa okwa gwedha po ta ti, oya hala ishewe okutaandelitha iitalenti yaahikingalo mboka taya ka hogololwa oku ulika iitalenti yawo muule woshiwike shika.
“Otwa tula uukuni kumwe nomahangano ogendji, mwa kwatelwa Sasha Charity Foundation, moka tatu ka gandja oopelesenda 10, kiihohela mbyoka tatu ka mona mo. Noshimaliwa shika otatu ka gandja ishewe kaanona mboka itaaya vulu oku ikwathela yoyene,” Shapwa ta popi ngaaka.
Poshituthi shika otapu ka landithwa omaludhi giikulya ga yoolokathana, mwa kwatelwa yopondje nomeni lyoshilongo. Otapu ka landithwa woo iikunwa mbyoka yi na iikolitha naambyoka kaayi na sha. Oshindji kombinga yoshituthi shika otashi ka tseyithwa komasiku gokomeho.
Uutekete otawu ka adhika pokati kooN$40-N$50. Noshituthi otashi ka tameka pohetatu yongulonene sigo ongulohi lela kehe esiku.