“Amu rara nu amu karara” ongari omerihekeneno nomakengezisiro wozombara zOvambanderu nOvaherero mehika rawo ra Kandjoze rongondjero yOtjisuta tjOtjiṱiro Otjindjandja pombongarero ohonge ndja karere ko oure womayuva ngambeno yetatu mOtjomuise okuza kOritjatano ngaa kOsondaha. 

“Motjinyo tja munene mu za tjimuinyo tjivi kamu zu tjiraka tja ora”, erakiza mari zu momukururumendu, Venauṋe Karumendu, Omukwenambura Omunaa Kwauti ngu ma yana Ovakwahere, ondekurona yorutjindo rwa Tjauana ngwa kotoka morutjindo orutenga rwo 1976 romakotokero wozondekurona okuza kOtjauana nai ngu turira mOeisepa mOmaheke. Eye pombongarero ndji ngwari moruhindo rOmbara Otjitambi yOvambanderu, Aleta Karikondua Nguvauva. 

Ama tja: ‘nai ovivepo ovisukususku vyaimba mbe hangahanga okurandisa nokuhurusisa Onḓuvasaneno Yapamwe poo Yaavehe, ndjiri Ojoint Declaration, ousupi OJD, pokati kohoromende ya Namibia noyEhi rOvandjoitji, ndji ve ta Ootjisuta tjombinḓu nominyo nomauini wOvambanderu, Ovaherero nOvakwena mbi va pandjara mohuurire yOvandoitji ndja katwara kOtjiṱiro Otjindjandja tjavo’. 

Ama hungirire kotuhindo twohoromende poo twokomiti yohoromende ndji ungura noviṋenge mbya sere okurira vyOtjiṱiro Otjindjandja nu ngwari nai mbya tikuhirwa momaunguriro nozongaro pokati kozohoromende zomahi ayeevari nga. Zotuhindo tu twa patere ombura ndja zuko mu Tjikukutu amatu ryangere otukondwa mu mu turira oviwaṋa mbya ihamisiwa i yohuurire yOvandoitji, okurandisa OJD. 

Karumendu ma tja otuhindo twi otupukise nu mu nao otjeri ohepero ozombara za Kandjoze okuryangera oviwaṋa vyazo nokuvipa ondjivisiro ndji he ri ombukise. “Hapo ove tji wa vaka ongombe yandje ozepa, tjazumba oove ngu wa sere okutya kutja muyo mo ndji sutu tjike?, wa pura nao otjepuriro nda pura mu umwe waimba vohoromende mbe tukauka moviwaṋa posi ya nḓe hi ya muna keziriro ngamba. 

Okuryangera oviwaṋa nokuzuvarisa ombuze nongurameno yazo mOtjiṱiro Otjindjandja, ondjari imwe yozongutiro zozombara nḓa. Ozo wina nḓa yauzire ongurameno yazo yokuyara nokunakaura OJD. 

Tja yakurire nomambo womuyaruke Ihe yOtjiwaṋa, Sam Nujoma, otjokumuyozika ngeri wina omambo eye nga pangiṋine nayo ozondekurona ozongwao, Mbakumua Hengari, wa raisa kutja omuyaruke wa tjere kutja otjirwa tjongutukiro tja ruwa ozombura katjondumba oruveze ndo, ngunda wina mave ru ozombura zarwe komurungu. Tjingetjo, Mbakumua Hengari, ngwa toororerwe otjOmuhaamise wOkomiti yOzonongo nongawondjise yoviungura, ma tja tjingetjo wina ongondjero yOtjisuta i nozombura ozengi komurungu. Ngari wina omambo wOrata yOkarukondwa Komatoororero Komondivitivi ka Katutura, Rodmana Katjaimo. Tja patere ombongarero ndji wa tjere ozondekurona ngaze ṱokuṱondjara pendje nokuyakura okamariva ku ke hi nonḓengu.