Ominista onkulu yoondjila nomauyelele Moses Amweelo ngoka a hulitha oshiwike sha zi ko ota ningilwa ehupulutho nena.
Ota pewa wo egumbo lye lya hugunina Olyomakaya. Ehupulutho ota li ningilwa kongeleka yaHosianna, omanga taka fumbikwa komayendo gaGammams koPioneers Park koWindhoek. Amweelo okwa hulithile moshipangelo shopaumwene shaLady Pohamba moWindhok mepipi yomimvo 73.
Otaku hokololwa Amweelo a kala ta ehama ethimbo ele sho a kala ta lwitha omukithi gokaankela. Minista okwa kala nokulilwa oshowo okutangwa koshigwana nokwaamboka a kala nokulonga naye.
Amweelo okwa yambukile momukunda Okatana moshitopolwa shaShana.
Okwa kala oshilyo shongundu Swapo osho wo oshilyo shomomutumba gwopashigwana, omanga ina ninga minista gwoondjila nomauyelele. Okwa li a tameke iilonga ye ongomulongisikola kosikola Iiwiyongo Combined, e ta kala ta longo pakathimbo ongomuhongi kiiputudhilo yopombanda Unam no-IUM. Amweelo okwa li natango ha shanga moshifokundaneki shoNew Era, kepandja lyomayele. Oshigwana osha kala tashi gandja omahekelelo omolwezepo lye.
Yamwe oya tanga Amweelo ongomukwathi, osho wo kuume koyendji. Minista kwali gwomauyelele Joel Kaapanda okwa ti, Amweelo okwali gumwe gomokuume ke kopothingo. “Onda longo naye ethimbo, ihe omulumentu ngoka onkulungu, ependafule oshowo omunankondo,” te mu tanga ngaaka.
Ta ti, okwa longo naye ethimbo ihe ina mona natango uuwinayi we. Kaapanda okwa ti ezopo lya kuume ke olye mu uvitha nayi oshoka ina kala eshi kutya okuli muuwehame. Omutekulu gwe Hilma Negumbo okwa dhimbulukwa hekulu ongo musamane gwomwenyo “Tatekulu okwa li omunyanyukwi nakuume kaayehe, nuuna tu li naye ohatu kala tu uvite ohole oshoka okwa li e tu hole,” ta popi ngaaka. Ta ti, aluhe ye li piituthi oha kala te ya ndjokonene kombinga yezimo, ta hokolola kutya oya tseya oshindji oshoka okwa kala he ya hokolele onziililonkalamwenyo yezimo.
Negumbo okwa ti, oya kanitha namwenyo mwaanawa, omukwathi osho wo ongudhi yezimo. “Omwenyo gwatatekulu nagu vuvulukwe nombili,” ta popi ngaaka.
Amweelo okwa thigi ko omukulukadhi gwe, aanona yatatu naamwayina yaakiintu yaali. vkaapanda@nepc.com.na