Auleria Wakudumo
Outapi – Omaulikilo oipindi oshoyo epito letando loukadona mOutapi okwa enda nawa.
Oshivilo shOlufuko osha tamekele momafiku momafiku 20 Juni neudo mOutapi nosha xula mu01 Juli.
Omupopiliko welelo lodoolopa yaUtapi Joolokeni Haidula okwa holola kutya ova olo lwotete va unganeka lwotete olufuko lina ovakufimbinga vahapu okudja nghene oshivilo sholufuko sha tameka mo2012.
Haidula okwa ti nonande ounyuni aushe oko wali kolufuko inava didilika nande oshiponga shimwe mopate ile oshiponga sholudi limwe li lilile. “Eshi otashi holola kutya ovanhu otava longele kumwe momhepo youmwainafana. Ngeenge ovanhu veli ponhele imwe, otashi dulika va pumafane, ashike neudo eshi inatu shi mona molufuko,” Haidula ta ti.
Ovashingifi ve dule po150 mwa kwatelwa omahangano opaumwene oshoyo omahangano epangelo okwa kufa ombinga molufuko. Ovashikingalo ova mwenyeka oshitufi eshi neengalo, omaimbilo oshiwambo nokuyakula ovalandi nokuyandja ouyelele nondjungu. Ruusa Hamutenja, umwe womwaavo vali tava landifa oikulya yoshiwambo okwa holola kutya okwa mona mo shakola molufuko neudo.“Neudo olufuko olali li etifa eenyono shaashi omalodu ange inaa hepa ngaashi eedula dimwe da dja ko. Okudja ashike efiku olufuko la patuluka, eekastoma oda kala tadi ende,” Hamutenja ta ti. Shuuveni okwa ti okwa hala alushe olufuko li kale lina eekastoma nomodula taiya.
Helena Shuuveni oo ali ena okatala komangadja, eexuxwa nombelela okwa ti okwa pandula odoolopa yaUtapi molwaashi aishe oyali peenhele.
Okwa ti oilandifomwa vayo oyali ya talala nawa shaashi ovali vena olusheno noipumbiwa aishe.
Haidula okwa holola yo kutya ova unganeka oshitufi eshi lotete nghene omutoti nOmukokolipresidente Sam Nujoma eheli mokati kavo. Nujoma okwa pala nawa ondjila yolufuko okukaleka po omufyuululwakalo wovawambo nokuanganifa ovakwashiwana.
“Nonande kemo vali mokati ketu, oitya yaye otai twikile okukwelengedja momatwi etu, Haidula ta ti ngaho.
Olufuko olali la patululwa pambelewa momafiku 27 Juni, kOmuprima woshilongo Elijah Ngurare oo a holola kutya oshitufi otashi holola ondjokonona yoshilongo.
Ovafuko ve dule po134 ova li va kufa ombinga molufuko ovo vey a okupewa ehongo kombinga yefimano lomufyuululwakalo.
Ovafuko ova kwatela mo ovanafikola, ovalihongi koiputudilo yopombada ya yooloka nosho yo ovanashilonga.
Haidula okwa weda po ta ti nonande olufuko loneudo la enda nawa, otava ka kufa ko natango eenghaku keemhandi ovo va kwashilipaleke kutya olufuko lomudo tauya ola pitilila po pwaali loneudo.
“Modula taiya, olufuko otali ka kala la tanda ko nomafiku otaa ka hololwa kohainga,” Haidula ta ti.
-wakudumoauleria@gmail.com