OKONGO – Aantu yomuhoko gwAangangela mboka haya popi elaka lyOshimashaka ye li kOkongo moshitopolwa shaHangwena oya ti oyu uvite yaaha shiwike ngaashi omihoko omikwawo moNamibia. Shoka osha nyenyetwa kaantu yomuhoko gwAangangela Etitatu kOkongo sho kwa li kwa patululwa oongulu dhosikola poNangolo Mbumba Combined kuminista gwomauyelele nomakwatathano gopaungomba Emma Theofelus. Esiku ndyoka Theofelus opamwe nangoloneya gwoshitopolwa shaHangwena Kadiva Hamutumwa oya popi kutya osho oshikando shotango taya uvu kutya oku na omuhoko gu li ngaaka kOkongo. Mwene gwomukunda Omboloka mOkongo Toivo Bernard okwa ti oku uvite omuhoko gwawo gwAangangela gwa patelwa kondje kepangelo, oshoka inagu ndhindhilikwa ngaashi omihoko omikwawo.
“Aanona yetu oya lesha omambo ngaashi aanona aakwawo, ihe ngele tashi ya kokumona iilonga ihaya kutwa. Onda ndhindhilike kutya ngele tashi ya kiilonga yepangelo Aangangela ihaya kutwa,” ta nyenyeta ngaaka.
Bernard okwa thindi omuthindo kutya, ngele etanga lyegameno osho wo lyopolisi nenge iilonga yilwe yepangelo tayi kutu Aangangela ihaya piti mo. Ta pula kutya yo kaye shi aantu ngaashi aantu aakwawo Aanamibia.
“Onda hala epangelo lyi tale omuhoko gwetu, gu ndhindhilikwe wo ngaashi omihoko omikwawo moshilongo, tse tu kale wo tatu mono omauwanawa ngaashi omihoko dhilwe moshilongo,” ta indile ngaaka. Bernard esiku ndyoka okwa li a popi melaka lyawo, lyOshimashaka ta popi ye ta yamukulwa kAangangela aakwawo ya li poshiindingili mpoka.
Maria Markus gumwe gomAangangela okwa ti, aantu oyendji ohaye ya tala ko ya fa kaye shi Aanamibia. “Aantu oyendji kaye wete eyooloko pokati kAangangela nAakavango, pamwe omolwaashoka twa gama kombinga ndjika, ashike tse Aangangela elaka lyetu olyi li kokule nOshikavango,” ta popi ngaaka.
Minista Theofelus esiku ndyoka okwa popi kutya shoka osha li oshikando shotango tu uvu kutya Okongo oyi na omuhoko gwAangangela.
“Inamu ninga omwenyo omwiinayi, nane Aanamibia aakwetu ashike, inamu patelwa kondje nando ngaashi tamu ti,” ta popi ngaaka.
Aangangela okwa li ya dhana iidhano yawo yopamuthigululwakalo nokwiitanga melaka lyawo.