Abraham Mwanyekange 

Komufala wopolifi moshitukulwa Oshana Sakaria Lungameni okwa koleka epatululo loshibofa la ningilwa Apostle Solomon Shoombe shi na sha nelundilo loulodi la ningilwa omukokele Tuyenikelao Kamhulu wokOkongo, weedula omi-71. 

“Epeko ole tu fika okudja koshitukulwa Ohangwena noshibofa osha patululwa mopolifi yaNgwediva nale,” ta ti. Lungameni okwa ti paife ove li metifa nokuninga omakonakono opo va tale ngeenge nakuningilwa oshibofa ota mangwa po ile ita mangwa po. 

“Ngeenge omakonakono okwa pu ohatu ka tula ko shiviha kutya omunhu ota mangwa po ile ita mangwa po. Luhapu oidjemo yomakonakono ngeenge ye ya ohatu i tumine komupangulindjai opo a ninge etokolo lahuuninwa,” ta ti. 

Oshivike sha dja ko Lungameni okwa lombwela oshifokundaneki shoNamibian Sun ta ti ova ningila nale omufekelwa omapulapulo nova mona ko nale omauyelele konima eshi okavidio kokongeleka yaShoombe katamaeka okumonika komalungula. 

Lungameni okwa ti efimbo limwe ovanhu ngeenge vaya keengeleka ovo vene hava yandje omapitikilo opo vafanekwe omanga in ava mona omajkwafo ooo vakakonga. 

Okavidio kamonika kuKundana komafiku 28 Marsa oka ulika nghene omuApostle Shoombe ta lombwele Kamhulu ta ti ye omulodi kome sho yovakwaneongal o. Okavidio oka li ka taambafanifwa kovanhu vahapu moshilongo.

Ovafitaongalo va yandja omaliudo avo koshikumungu: 

Omubiishofi Lukas Katenda wongeleka yoReformed Evangelical Anglican Church of Namibia (REACH) eshi a ya meenghundafana noradio yOmulunga okwa ti omafinhamongo ongeleka nomakanghameno oo a pumbwa okushikulwa tete kovafita manga inava pula komesho naayo tava ningi momaongalo. 

“Ovafita ova pumbwa okufimaneka ounhu womunu vo tavelivangeke okunyonaunapo eenghalamwenyo dova shitwa vakalunga.” 

Okwa ti ovakwashiwana navo nava shiive yo kutya keshe kongeleka to i okuna omalandulafano ako. “Nanye omu hole oinima, eshi wa ya meongalo lovanhu owa twa kumwe nomalandulafano ongeleka oyo, paife eshi wa ningilwa ko oinima ino i panda onghee ngaa wa kwena ove wa dimbwa kutya kakwa li wa ufanwa ko komunhu oove mwene mwene wakufa etokolo loye,” ta ti. 

Laban Mwashekele okwa ti ongeleka ihai mono ondjongo. “Kape na omufita ha mono ondjongo shapo naye oku i na. Omilaulu odo ashike hadi monafana nadikwao ndele omhepo yaKalunga kai na fiku i mone omilema molwaashi yo oi li mouyelele,” ta ti. 

Mwashekele okwa ti oku na ohokwe nohole okushakena novafita vopaife unene ovo va dja nokalapi ka toka koNigeria opo e va longe osho shi li mondjila. “Ounona ava ova pumbwa epukululo li li mondjila opo va kwatele po omifyuululwakalo nomalandulafano ongeleka,” ta ti. 

Omufita Sem Abiatar okwa ti ota ilikanene Shoombe. “Ohatu ku ilikanene mumwameme, itatu dulu tu ku ekeleshi. 

Itashi ti ove ku shi omulumenhu waKalunga, nonghee ngee oshilemo shilaula she ku hanga nena nafye oshe tu kuma pamameitavelo,” ta ti. -amwanyekange@nepc.com.na