KATIMA MULILO – Babaipeleka bashumi amabeli kuzwelela mwa lilalanda zelobapeli za sikiliti sa Zambezi bakafumana lituto za kuluha zeka tanda liviki zepeli. Lituto ki mulelo wakatengo ka sikiliti sa Zambezi mi lisulezwi masheleñi ki kampani ya sicaba ya Cosdef Oyetu Purojekiti. Hana bulela kubao baka fiwa lituto muinasipula wakatengo kasikiliti sa Zambezi Matengu Simushi, naize lituto halina feela kuyandulula lyano la bao baka fiwa lituto, kono ikaba kolo yakuli bafumane zibo yakukona kutahisa ni kuikupulela lika. 

“Mwalifasi la kacenu leli cinca, ki kwabutokwa kuyaha tamahano ni lika zetahisa kuli lueze hande. Mwaliviki zepeli zetaha, muka itenga mwalika za kueza kamazoho, kuikabela zibo ni kuhulisa tatululo ye mukona kubelekisa mwa lipisinisi za mina,” nekubulezi Simushi. Naekelize kuli lituto hakitaba feela ya cwalecwale kono kikuituta zabukamuso bobuzwelapili. “Zibo ye muka fumana kasamulaho alituto ze ika mi bakanya ni kumikwalulela mahaulo alitaba zende.”

Muzamaisi wa Cosdef Oyetu Purojekiti Samuel Sheyanena naize kampani itamahani mwa mulelo ofita feela kuluha, kono kufa zibo, kunanula ni kutahisa cinceho yezwelapili mwa bupilo bwa sicaba sa Zambezi.  “Oyetu Purojekiti iyanduluka kuzwa mwa kilasi. Ki taba ya kutahisa kolo ya kuhula, teñi ze luhiwa libabazwa famisika katata, mwanaha ya luna ni kwanda naha. Lipisinisi za Cosdef ze ezwa kiabao babafumani lituto kuluna li ipumana mwa misika, kuli bafumane temuho ni tulo ye balukela,”nekubulezi Sheyanena.