Auleria Wakudumo
Ongadu oyo ya li ya monika mEtaka popepi nomukunda Oshihaku muJanuali natango otai twikile okumonika peenhele da yooloka kovakwashiwana hava kwata eeshi monhele omo.
Meenghundafana naKundana, kansela woshikandjohololo Onesi Festus Petrus okwa ti oshiwana onghene tashi twikile noku mu shivifila omalinyengo ongadu mEtaka.
“Ongadu ohai monika unene efimbo lokomatango eshi ovanhu tave ya okukwata eeshi shaashi efimbo longula ihapa kala ovanhu,” Petrus ta ti.
Nonande mEtaka mwa monika ongadu, ovakwashiwana onghene tava twikile okukwata eeshi monhele omo, vati ohave shi ningi noukeka.
Petrus okwa shiivifila Kundana kutya odula ya dja ko muAguste naSepetemba, mEtaka natango omwa li mwa monika ongadu ashike vati ovakwashiwana inava itavela osho tava lombwelwa.
“Onda li ndaya nokooradio handi shivifile ovanhu opo va kale va kotokela oshinima osho ashike inava hala okuitavela,” Petrus ta ti.
Natango, omulumenhu umwe ha kwata eeshi okwa li vati a mona eengadu mbali dakula peenhele da yooloka odula ya dja ko ashike ina lopota oshinima sha tya ngaha meendelelo.
Petrus okwa weda po ta ti oshinima shovakwashiwana inava hala okuitavela osho tava lombwelwa osho sha eta a kwate okavidio kongadu oyo ya monika momafiku 3 Januali neudo opo a kwashilipaleke osho ta popi.
Ouministeli womidingonoko, eefuka, nomapashiono owa holola kutya natango onghene tau twikile okuninga eenghendabala da wedwa po opo ku kwashilipalekwe kutya ongadu oyo ya monika mEtaka moshitopolwa shaMusati oya tembulwa nokutwalwa konhele imwe.
Edi oda hololwa komupopiliko wouministeli oo, Romeo Muyunda.
Muyunda okwa hokolola ta ti ouministeli wavo owa kendabala omikalo da yooloka opo va kwate mo ongadu ashike omikalo adishe oda xulila mounyengwi.
Onghendabala yotete vati ova yula nonete mondama unene ombinga oyo ya monika ongadu ashike nasho vati eshi osha xulila mounyengwi.
“Onghene otwa twikila nonghendabala onhivali yomukalo wokutula oikulya keendjolo ashike nao owa dopa shaashi ongadu inai kwatwa nande okondjolo imwe. Eshi otashi dulika ongadu ishona natango, inai ika omaludi oikulya ahapu ngaashi ombelela,” Muyunda ta ti.
Muyunda okwa ti eshi otashi ningi eenghendabala douministeli okulundulula ongadu didjuu.
Nande ongaho, okwa holola ta ti ouministeli otashi dulika u ka kwafelwe oikwa noipangifo okudja kombelewa kOkavango va kwate nokulundulula ongadu oyo.
“Otu na ashike okukonga omukalo muwa opo tu kufe mo nokutwala ongadu konhele imwe. Ongadu itai dipawa ile i monifwe oshiponga,” Muyunda ta ti.
Muyunda okwa weda po ta ti mopaife kape na naana oumbada wongadu oyo shaashi ihai nangele oimuna ile ovanhu shaashi inai ika ombelela natango notai li ashike eeshi.
Ouministeli owa fekela ongadu ya pitila mokanala aka ka eta omeva okudja moAngola fiyo omEtaka.
Ngeenge ouministeli owa kwata ongadu oyo, opo vati tau dulu okukwashilipaleka ngeenge ongadu onghadi ile ondume notai ka lundululilwa komulonga waKunene ile koRuacana.
-wakudumoauleria@gmail.com