KATIMA MULILO – Kwa buñata bwa baituti, lizazi la pili la sikolo mwa litopa zepahami ikona kuba butata. Kuiputezi kukatana ni maticele babanca, kutwaela silalanda se sinca, ni kueza balikani babanca. Kono baituti ba makwengo kuzwelela kwasikolo sa litopa za kwatasi sa Masambo mwa silalanda sa pukelezo ya lifolofolo sa Bwabwata, zibo ibile yende.

Musipili wakuya Masambo olikana libima ze mwanda ka zene kuzwa tolopo ya Katima Mulilo, ki petuho yetuna mwa musipili wabona wakukena sikolo. Ha ibonisi feela kutiiseza kwa bona mwa kuituta, kono iyemela simbule sa buikuhumuso mwa sicaba sa bona, teñi kolo yakufita kwa litopa zepahami ya fukuzeha.

Ticele yana baluta lituto za zibo ya bupilo, Saviour Mudala, yana basindeketile lizazi la bona lapilli mwa litopa zepahami Lamubulo, usiala ana ni sepo hala bukamuso bwa bona, nahatelezi hala butokwa bwa kubona kuli sicaba se si kungulezwi kwa tuko inge Makwengo bakwalulelwa linzila zende. Kushimbulukela mwa litopa zepahami ifetuha kuba susumezo yende kwa banana babañwi kuli ni bona bakona kulatelela mutala oswana.

Baituti ba bane ba ezize hande mwa sitopa sa busupa ñohola, ki babañwi babana ni litohonolo bane bafumani sibaka fasikolo sa litopa zepahami sa Caprivi mwa Katima Mulilo, ili sesiñwi sa likolo ze eza hande mwa sikiliti. Mudala naize baituti neba iñolisize kuituta lituto za sayansi, mi baka ina mwa malobalo akwasikolo. Uikumbuta zeo baituti ba ezize mi una ni sepo yakuli baka zwelapili kueza hande. 

“Ni ziba kuli se ki sesiñwi sa likolo ze eza hande mwa sikiliti. Nina ni sepo bana baluna baka eza hande mwa lituto za bona ni kulutabisa,” nabulezi. Hala banana bao ki Lisa Ben walilimo ze lishumi kazetalu, yana ikabezi tabo yahae yakukala lituto mwa litopa zepahami. “Ni ikutwa hande kuba mwa litopa ze pahami fasikolo sa Caprivi. Ne ni pasize sitopa sa busupa hande hahulu. Nisepisa kubala katata ni kuli ni tabise bashemi baka ni sicaba,” nekubulezi Ben.

Ulakaza kuli kwapili haka feza sikolo ayoba muoki, ili taba yali yakonahala kakusebeza katata. Muituti yomuñwi, Mukano Boysen, niyena walilimo zelishumi kazetalu, ni yena nabulezi manzwi aswana, mi nabulezi hala takazo yahae yakueza hande. “Nika ituta katata kuli ni pase sitopa sa bulobapeli. Nibata kuba mufufisi wa fulai hanika hula. Sikolo sa litopa zepahami sa Caprivi neli sona sapili kone ni tabela kutaha, mi lutabile hahulu kuli lufumani sibaka fa sikolo sesiñwi hala likolo ze eza hande mwa sikiliti,” nabulezi atezi buitamo.