BA mubuso ba tabela milelo ni mingendenge kaufeela ya kubona bayahi ba naha ye inge ba fiwa pene ya sikolo ya kuli ba zwisezepili lituto za bona mwalikosi ze shelana. Manzwi a, na bulezwi ki Likwambuyu wa Likolo la Misebezi, mutompehi Alpheus !Naruseb ya nali sibuabui yo muhulu kwamukopano ono boni bayahi ba naha ye inge ba fiwa mashilin`i a kuzwisezapili lituto za bona mwamazazi a felile mwatolopo ya Rehoboth.
Banana ba loban`wi yona (9) ki bene ba filwe pene ya kuzwisezapili lituto za bona ba mano feza sitopa sa bona sa giledi 12 mwatolopo ye swana.
Banana neba filwe pene ye likana N$50 000 ka yo mun`wi ni yo mun`wi.
Pene ne neuzwi kiba katengo ka Hope Education Trust, ili katengo ka ka etelezi linzwi la Mulimu.
Katengo neka bupilwe silimo sale sa 2004 mwatolopo ya Rehoboth.
Mwamanzwi a hae, Likwambuyu !Naruseb naize tuto ki ya butokwa kuli sifumu sa naha si kone kuhula hande ni kuyema mafulo. Kacwalo na tiisize kuli tuto ki mutomo wa zwelopili ya naha ni naha mi kacwalo naha ni naha sina Namibia I swanela kulika kamo ikonela kaufeela kuli lisitataliso kaufeela ze beyela tuto mwamulaho li lilimaniswe kapa kukungulelwa kwatuko.
Kakaya ka Likwambuyu, mubuso u nosi ha u koni kunanula tuto fa mayemo a swanela kacwalo kutokwahala mazoho a man`ata a shelana a bayahi ba naha kuli mibonda kaufeela ye taha mwanzila I tatululwe hande.
“Ki kwabutokwa luli kuli lu swalane mazoho ni tutengo kaufeela totu swana ni katengo ka Hope Education Trust ka mulelo wa zwelopili ya tuto kwabana ba luna. Tuto kiya butokwa kuli banana ba kone kuhupula hande ka liseli la misebezi leli tokwahala mi banana ba luna mwanaha mo ba swanela ku zwisa linepo ze tokwahala hande,” Likwambuyu mwamanzwia hae.
Nihaike Likwambuyu na kile a bulela manzwi a, na kile a bulela hape kuli babanca kappa bona banana bana ni lisitataliso ze shelana mwabupilo ili lisitataliso ze tokwa mutundamo ni kelezo kuli ba kone kuyema hande. Hala lisitataliso zeo, Likwambuytu na kile a tumusa kaza bukeshebisi bwa lika ze kola, bubangoki, butuku bwa HIV/AIDS ni bunjebwe hala zen`wi.
“Ki niti luli kuli lu potolohilwe ki lisitataliso ze kono, ha lu swaneli ku lifiteza ahulu kuli libe mabaka a mafosisa a luna mwabupilo. Lu swanela feela kutiya ni kuba ni susuezo ni mutundamo sakata kuli lube bayahi sakata mwalilalanda za luna ni minzi,” na tiiselize hape.
Na kile a kwala mulomo wa hae ka kubulela kuli, limpangaliko kaufeela linze li swelwi kuno ezwa kuli naha I swalwe hande ki babanca mwabukamuso mi sesi tokwahala feela ki sa kuli bayahi ba itusise lika kaufeela zeli fa pila bona kuli bukamuso bu bonwe hande.