LIBIZO leli nca la sikiliti sa Caprivi sese si bizwa Zambezi kapa mane yona Lyambai mwa mazazi a cwale, neli kile la tisa kuli mane bayahi ba sikiliti sani baba ipiza kuli ki bona (ma) Caprivian baba bilaela ba kone kucaula simubuso mwa tolopo ya Katima Mulilo biki ye felile.
Bayahi ba tolopo yani baba ipiza kuli ki bona (ma) Caprivi bababilaela neba konile kucaula simubuso biki ye felile mane ni kutambeka lin`olo la bona la linonge kwa ofesi ya Mubusisi wa sikiliti, mutompehi Lawrence Sampofu.
Bayahi baba bilaela ba bulela kuli libizo la Caprivi la yahisa mi kacwalo neli sa swaneli kucinciwa kakuli li swala mishobo kaufeela ya sikiliti sani
Bayahi bene ba caula haba lati libizo leli nca mi neba tabela kubona Mubusisi wa sikiliti inge a bapala kalulo yen`wi ni kukutiseza ona libizo lani la Caprivi.
Nihaike yena mun`wi Mubusisi wa sikiliti nasa liyo mwa ofesi mwa nako yani, na konile kufa maata ku mutusi wa hae wa litaba ze shelana-shelana kuli a kone ku muyemela ili yena mutompehi Ignatius Nkunga.
Mwa lin`olo la nonge, bayahi ba bilaela kuli neba sika potelwa ni kuli hakuna mutu yana tisize ona litaba zani kaufeela ka butungi kubona ili kuli libizo li konwe kuciciwa kacwalo haba lati libizo leli nca.
Mwa nako yene ba caula simubuso, mapokola neba kile ba hanela bayahi kuli ba kene mwa waya ya sipokola ni kubala ona lin`olo lani, ili nto yene tisize kuli mane sibuabui wa sikwata ili yena Robert Matongela a kone kubala ona lin`olo lani fande ya waya.
Bayahi neba tabela kutambela lin`olo la linonge kuyena Sampofu kono ka mukwa wa kuli nasa liyo neba kile ba nyema maswe kakuli kakuya ka bona neba tebela ku mufa ona lin`olo lani ka sibili isi kufa muelezi wa hae mwa litaba ze shelana-shelana.
Hane ba bala lin`olo la bona la linonge, sikwata nesi kile sa tiiseza kuli libizo leli nca la Zambezi lita bulaya sizo mane ni mipilelo ya bayahi baba simuluha mwa sikiliti sani.
Kakuya ka bayahi, kucinciwa kuta tisa kili mane libizo la Brenden Kangololo ni libizo la Mishake
Muyongo li sike la kutekeha kakuli ki bona bene ba kalile kopano ya lipolitiki ya CANU mwa Caprivi mwa lilimo ze felile.
Pepa ye swana ya linonge I akaleza kuli katengo kaka bona za miseto neka palezwi kupeta musebezi wa kona o munde ka kutiiseza kuli neka tisize mifilifili mwa sikiliti sani kakuli museto wa sikiliti ni ona neu kilwe wa nyinyifazwa.
“Halu tabeli musebezi kaufeela ono ezizwe ki katengo kaka bona za miseto kakuli hakuna muyahi yana konilwe kuikambotwa ni yena kuamana ni lona libizo le. Halu yemi fa lwa ziba mulelo kaufeela wa Muso wa kucinca ona libizo le kuzwelela mwa lilimo za kwa mulaho.”
Bayahi hape neba tinile liapalo zene n`ozwi kuli sikiliti sa Zambezi hasi tabelwi mi kacwalo si swanela kukutela kwa sikiliti seba ziba bona ili sikiliti sa Caprivi.
Bayahi baba swana neba kile ba nyaza kuli bun`ata bwa lika kapa mane mabizo asa cincize mwa sikiliti sani na kilwe a ezwa cwalo kusina swalisano kapa mane kubuza ona bayahi baba swana. Neba kile ba bulela kuli libizo la sikolo sa Schuckmannburg neli kilwe la cicwa bayahi inge basa zibi ka zona lizwelopili ze kaufeela ka kutiseza kuli ni haike sikolo sa Kabbe nesi cincizwe kuzwa kwa libizo la Kabbe combined school ni kubeiwa libizo la Dr Sam Nuyoma Combined School bayahi inge basa zibi ka zona lizwelopili ze kaufeela.
Nkunga kwa lineku la hae na kile a sepisa kuli lin`olo la linonge lani uta li tambeka kwa ofesi ye swanela ili kuli ofesi ye cwalo I kone kupeta musebezi wa yona mane ni kualabela fa linonge za batu bani kaufeela.
Batu bene ba talimezi ‘sitilaka’ sani ba talusa kuli bun`ata bwa bayahi bene ba eza sitilaka sani ki bayahi baba itengile mwa litaba za lipolitiki mi ki bayahi baba yemela likopano ze lwanisana ni Muso za kwa mukunga ili likopano ze cwale ka RDP mane ni COD cwalo, hala likopano zen`wi.
Ze ni hahalicwana, licaziba kapa mane bayahi baba itutile ahulu kuamana ni litaba za kwa mulaho mwa sikiliti sani baba cwale ka Dr. Bennet Kangumu ba tiiseza kuli libizo leli nca la Zambezi ki libizo leli utwahala leli yaha hande sikiliti sani kakuli li swala sikiliti sani hamoho.
“Kucinva libizo hakuna kusinya lika kapa mane kushandaula lika zen`wi za kwa mulaho, kacwalo lu swanela feela kuswala ona libizo leli nca le la luna kusina lika zen`wi ze maswe zelu bapanya kulona libizo le,” ne kubulezi Kangumu.