Libaka zeñwi mwasikiliti sa Zambezi halisakonwa kufitwa kuzona kamukwakwa bakeñisa kunela hahulu kwapula.
Viki yefelile nuka ya Lyambai neyemi fa 1.8mita mi kikale ifitelela tikanyo ili yeswala kuba 1.6mita.
Mubusisi wasikiliti sa Zambezi Lawrence Sampofu nanitifalize kubateñi kwamuunda otisizwe kipula mwatolopo ya Katima Mulilo, hamoho cwalo ni silalanda sa Kabbe ya Mbowela.
“Nuka ya Lyambai inze inanuha kabubebe, mi luitekezi muunda. Haluzibi butuna bwa ona, luka kona feela kuziba kwamafelo aYowa ni makalo aLiatamani. Libaka zetibiswa kimezi amuunda mwasilalanda sa Kabbe ya Mbowela halisafitwa kuzona, batu basebelisa mikolo,” nabulezi.
Libaka zekauhezwi kiMuzii ni minzi yeli bukaufi. Naize hakuna likozi zebihilwe. Hala mezi apula atibisize Katima Mulilo, Sampofu naize asinyize mikwakwa. “Makululu amatuna natibisizwe. Bakwaezi nebana ni kukabelisa limotikala zabona mwamezi. Mikwakwa isinyehile kakuli pula netisize mangolombela,” nabulezi.
Muzamaisi mwaofesi yebona zamayemo alihalimu nafile kelezo yakuli sicaba sesipila mokufita mezi amuunda siitukiseze kututela kwalibaka zelumbile.
Sampofu naize nihakuli cwalo balimi basa zinyazinya kuisa likomu zabona kwalibaka zelumbile.
“Baswanela kuombosa likomu zabona kuli isa kwamushitu isiñi kulibelela kuli mayemo atepelele,” nakupile.