Namibiab di !auga!hūsi !hûǁare-aon ge nēsi hoa ǁaegu xa ǀgaisase ǂkhâ!nâs !aroma go ǂherexa, ǁnāpakha Spaini tsî Braziliab hâkha ǂoa ge wekheb di Donertaxtsēs ai texnise huiba mās mîmâisa ge dīs khao!gâ. Texnise huib nî !khōǂgās ge hurib !gamma xu oli-e ǂgaeǂguis ǁawosasiba mās tsî sîsenǁares ǁkhawa a sîsenūhe ǁkhā enerxib tsî ǁgammi ǂnamipe. !Hūǂnûǁkhaeba-aokha, Loss San Martini (Braziliab) tsî Alberto de la Calleb Spaini dib hâkha ge ǂoa ge wekheb di Donertaxtsēs ai kharagaguse kha ge ūhâ i saridi hîa ǁîkha !hūǂnûǁkhaebas ǁaeb di !gûǀams khao!gâ nî !Hūb ǁûs, Netumbo Nandi-Ndaitwahsa tawedeǁnāxuse !Hūb Oms tawa ge ūhâ i. 

ǁGamǁaredi ge sao ra dana !âgu ǂnamipe gere !gû; ǁkhaubas, ǂharugub, ǁgau!nâs, ǁkhawa a sîsenūhe ǁkhā enerxib ǁuib tsî oli-e !gam huriba xu ǂgaeǂguis ǁawosasib tsîna. 

Loss San Martini ǀkhas ge ūhâ i ǁgamǁares !nâs ge Nandi-Ndaitwahsa ǁîba gere mîba, Braziliab a Namibiab di kaise a ǀgū tsî ǀgui ǀgaub ai hâ sîsenǁareba Namibiab !norasa xu ra māsa. ǁÎs gere !gōsase ǀgonǀgon!gao !khais ge, huribaib di sîsenǁareb !nâb ge Braziliaba a mā texnixe ǂkhâ!nâs, nēti ī huri-ammi di !gao!gaoba xu ǂnuwihes dis !nâsa. 

“Nēsi da ge sida 1 500 xa a !nāsa hurib aib ǁkhāǁkhāǂuisa khoen, Braziliab !nâ a ǁkhāǁkhākhâisana ūhâ.” tis ge Nandi- Ndaitwahsa ge mî. ǁKhātis ge !hūb ǁûsa a ǂan!gâ !khais ge, Braziliab di ǂkhâ!nâs ge Namibiaba a huisa, !auga!hūsi ǂgaoǀkhādi hîa huriǁuib !aroma Law of the Sea !naka hâdi ai a dīǀoaǀoasa tsî ǁkhāra tawa. 

ǂHarugub ǀkhāb ais ǁîsa ge mîs ge, Walvisbay Corridor !Nans ge ǀgūǁae, São Paulos !nâ berosa a ǁkhowa-amsa, Namibiab huri-ammi !naoǁhôade Suid Amerikab ǀkha nî !hûǁarese. 

ǁÎs di tawedeǁnāxus, Spanse !hūǂnûǁkhaeba-aob ǀkhas ge ūhâ is !nâs ge Nandi-Ndaitwahsa Spaini ūhâ ai!gû tsî ra ǀomkhâi !gâi!gâisens Namibiab ǁkhawa a sîsenūhe ǁkha enerxib !nâ ūhâ ǁkhāsib, ǁgau!nâs tsî ǁgam-e !khōdanasa gere aimâi. 

“Spaini ge ǀgaisa !gâi!gâibasensa sada !aroma da ai!hūba ra ǁam kai !âgu !nâ ǁîb tsîna ūhâ, !gōsase ǁkhawa a sîsenūhe ǁkhā enerxib tsî texnise ǁkhāǁkhākhâidi tsîna,” tis ge Nandi-Ndaitwahsa ge mî. 

“Namibiab ge Afrikab !nâ ǀgui ǂhâǂhâsa tama hâ, xawe hoa !hūbaise. Spaini ge Namibiab ǀkha ǁkhawa a sîsenūhe ǁkhā enerxib, !omkurus ǁkhāǁkhākhâidi tsî ǁgam-e hā-ūs ǂnamipe ra sîsenǁare ǂgao,” tib ge !Hūǂnûǁkhaeba-ao de la Celleba ge mî.