KATIMA MULILO – Sikiliti sa Zambezi nihasina ni mubu onunile ni mafulisezo amande alimunanu, mubusisi wasikiliti sa Zambezi Lawrence Sampofu viki yefelile nafitisize pilaelo kuli
hakuna masimu amatuna mwasikiliti.
Nihakubonahala kuli likhuta zene zasizo (Mafwe, Masubia, Mayeyi ni Mashi) neli file mubu wamapurojekiti anjimo. Hane afitisa manzwi ahae amayemo asikiliti Labune, Sampofu naswabisizwe kitaba yakuli mupunga one usulezwi lulelule lwa
masheleñi wa Kalimbeza haufumani hande kutulo.
Purojekiti ya mupunga ya
Kalimbeza ne itekezwi kuba purojekiti yetuna hahulu yelima mupunga, kuli ikone kuba nikolo mwakubona kuli kuna ni lico mwanaha Namibia, kono mwalilimo zefelile kubile nikutulo yelikani. “Hakuna ze ezahala
kwale.
Purojekiti ye ya mupunga
neswanela kuba nto yetuna,” nekubulezi Sampofu.
Silimo ni silimo muuso kalikolo la njimo uzwela pili kusulela purojekiti ya mupunga lulelule lwa masheleñi ku ipulusa kwakushwa.
Mwalilimo zepeli zefelile hakuna mupunga one ucalilwe bakeñisa
mabaka acwale kakutokwa mulilo wamagesi, kusalifiwa kwababeleki, kutokwa mafula, masimu asikalikanyelezwa, ni lisebeliso zesupezi. “Sicaba nesi neuzi mubu walihekele ze 196 kono kusebelisizwe feela lihekele zemashumi
amane.
Nihaike kulima mupunga kibutata, kuna ni lika ze ezahala. Unam ibata kutaha nikukala kuzamaisa Kalimbeza. Basweli kueza hande kwa sikolo sa lituto zepahami sa Ogongo. Nelumemilwe kuyobona kutulo ya mupunga. Muhupulisise, babali mwamabala basweli kulima mupunga. Lunabo babana ni mubu onunile?” nabuzize.
Muyemeli wasilalanda sa Kabbe ya Mbowela Bernard Sisamu, Kalimbeza iwela teñi niyena nafitisize maswabi ahae, kuli purojekiti ifilwe mubu omuñata kono hakuna miselo
sakata.
“Nikandekile ni likolo, mi neni fumani lisepiso zene swanela kutaha la 1 Lungu 2023. Neni zibisizwe kuli kuna masheleñi alikana bolule balishumi (N$10 million) kuli purojekiti iyandululwe kono hakuna sesi ezahezi,” nekubulezi
Sisamu.
Nihakulicwalo Sampofu naize balimi babamwi mwasikiliti basweli kueza hande nikubona kuli kuna ni lico mwasikiliti.