KATIMA MULILO – Mapokola mwasikiliti sa Zambezi babilaezwa kikuekezeha kwa busholi bwa limotikala, teñi kubihilwe lipiho liketalizoho zabusholi bwa limotikala mwa likweli zetalu zefelile. Mwa piho ya cwale limotikala zepeli zanjimo za masheleñi alikana bolule bababeli kalikiti zemyanda yelobapeli (N$2.8 million) neli tibezwi Labune.

Kanako yakuikambota ni babihi bamakande Labutau, muzamaisi wasipokola mwasikiliti sa Zambezi Andreas Shilelo, natolokile kuli kupo yakubata kuleka matirakita amabeli ne amuhezwi ki sintolo sesi fumaneha mwa Otjiwarongo, mi kabuputeleli naswanela kuto tambekwa kwa ofesi ya AMTA mwa Katima Mulilo. Kono napulusizwe mulekisi waona hakala kubilaela amano bulelelwa kuli ayo atuluseza kusili kwanda ofesi yene kulubelwa kuli ne alekile.

“Mapampili kaufela nalukisizwe mi tumelelano yakuleka matirakita amabeli ne nyatezwi. Mulekisi aitukiseza kutaha kwa Katima Mulilo, kono hatofita nekusika zibahala hande kana matirakita nalekilwe ki AMTA. Nebatilo katana feela baana bababeli bane baipitisa kuli ki babeleki ba AMTA, mi nebaitukiselize kuamuhela matirakita,” nekubulezi Shilelo.

Shilelo nazwezipili kufa mamela kwabalekisi balimotikala kuezanga lipatisiso kana babata kuleka bazwelela koba bulela kuli kona koba bazwa, pili basikaba tambeka kale limotikala. Naize mwa piho yeñwi yacwalecwale yene bihilwe mwakweli ya Muyana, limotikala zepeli zamufuta wa Isuzu double cab zene kulubelwa kuli neli lekilwe ki kampani ya Nampower mwa Katima Mulilo neli tambekilwe kwa masholi mi nelisika fumaneha.

“Haluzibi kuli batu ba bafumananga kai mapampili ao, kapa ki mwamaofesi kapa famakepe aliofesi zeo. Kamutala, mwa piho ya Nampower. Mapampili neli ona kampani ya Nampower isebelisanga haileka limotikala kokuñwi. Hautalima kakuba mulekisi walimotikala wakona kulumela nikulukulula limotikala. Kona hanibata kueleza balekisi balimotikala kuli bano tokomela pili basika lukulula limotikala,” nekubulezi Shilelo.

Nabulezi hape kuli mapokola ba akaleza kuli masholi bane ba uzwize limotikala za Isuzu kibona bane babata ku uzwa ni matirakita. Naekelize kuli buñata bwa limotikala ze uzwiwanga lilibanga mwanaha Zambia. Pius Josef mulekisi kuzwelela kwa kampani ya Hoffman’s Farm Implements mwa Otjiwarongo naize naitumela kuli buputeleli nebusika ezahala kakuli nekaba sinyehelo yetuna kwa kampani.

“Nitabile hahulu. Kuswana inge tolo. Hanikoni kutoloka tabo yaka kuli matirakita hasikaya asaliteni. Neni lizelize muzamaisi wasipokola mi neba alabezi kaputako, naitumela neba ezize musebezi sakata,”nabulezi. Baputeleli bababeli babakulubelwa habasika tamiwa kale, bamano baleha habalemuha kuli mulekisi nabata kuba kwacisa. Lipatisiso zamapokola lizwelapili.