Khoekhoegowab

Duits!hūb di ǂHanub ge a ǁaxa ǁaupexa N$256 miljunsa ǀhaohaos ǀkha, Namibiab nî hui!nâ-ūse, Covid-19 ǁōs ge hā-ū ǁgoaǂuidi, !aub!ûi!gâdi tsî !narisarimas !âkha !nâde oresa hōbatsâs !aroma. 

Ministeri ǂNamipeb, Haiǀgoms mû!gâs tsî !Narisarimas dib, Pohamba Shifetab ge !aub!ûi!gâdi ǁanin ai ǂgaisa go dī, in ǂgōsen ǁnāti ī mā-ams ose hâ !audi tsî ǁgauo!nâse !aub!ûi!gâdi marina sîsenūs tsîna xu. Nēs ǀkha ra !gûǁareseb minister age mîs ge, ministeris go a ǂanǂuisa tarin nē mā-ams ose ra dīhe !audi !gâb ai !khōdana-aose ǂnôasa, !aub!ûi!gâdi ǁanin tsîn a !â!nâse.

!Kharagagu mîǂgā-aon ge !haosi ǂnûs ǁanina koasa ge mā, !Haosi ǂNûs !nân ge nē kaise !onkhao hâse ra !gawaǀîhe ǂAnsa ǀGoragus ǂHanumā!âsa a !khō!gâsa. Direkteri, ǂHaitsi Xoaǁguigu Ôa!nâs ǂNûiǂgās dib, Graham Hopwoodi ge ǂoa ge wekheb Wunstaxs ai ge mî, nē ǂHanumā!âs di !khō!gâs !gâi xū-i ase !hūb di demokrasis !aroma īsa, ǁîs hîa ǂansa !hūǁîna hā-ūbas,  mîǂgāba !hūb !nâ ra ī xūn !nâ ūhâsa mâbasa. 

!Gameba ra ǀgora ǂgao khoen !aroma i ge !aruǀî ǂhâbasa tide, ǁîn nî ǀAeǁgams tamas ka i o Oshakatis ǀgora!gâ!khaigu ǁga ǀgoras !aroma !narisa, !gameǀgoras ǁhōn ǀgūǁae ǂam ǁnâu!gâ!khaigu !nâ !hūb a ǂhabase ǀaweǁguib !oa nî ǁnâu!gâhe amaga. 

!Hū-omkhâis ministeris ge ǂgari-aon tsî ǂhabase hâ ǀhûhâsiga ge !khâikhom, ǂkhaikarin nî hâsa ǁnāpas ge ǂHīǁōs Bovin Pleuropneumonias, !nāsase sōǁōs ti a ǂansasa a khoraǂuisens khao!gâ. 

ǀAeǁgams !Ā!khōmais di ǀawa!namn ge ǂâiǂhansensa ǁnāti ī !nari-aon hîa ǂans !naka tsî ǂhanuo!nâ-i a !khaisan a ǂan hîa ama tama auto!gôadi tsî ǁkhāti ǀguis xa a !nāsa !gôade ǀgui autos ai ra sîsenūn ǂnamipe ra gowaǂui.

ǀOrosib !anuāǁgam-i dib ge !omgudi hîa khoen tsî !aubǀgurun ǁaegu ra hâba ais ǁga Zambezib, Kavangob Aiǂoas tsî Kavangob Huriǂoas ǀkharigu !nâ ra  ra ǀarosen kai.

!Hūb di ǁÛb, Hage Geingob ge ge mî, Namibiab nî ai!gûsa, huiba mā tsî sîsenǁares !nâ, ǁgūbas Afrikaba ǁîb ǀgôaron !aromab a !norasa tsî ǂâuǀoa hâ !haros ai sī-ūsa ǁawoǁawos dis !nâ.

ǁNāpan ge ǁaupexa 8 000 !hū!khai-ôa-aon tsî !hūsaben tsîna Namibiab !nâ hâ, ǁîn hoan xa a !nāsa !gôab din a Congob !hūǁîse, ǁnāpab noxopa Democratic Republiki Congob dib di ǀnî !âga noxopa sâsāo!nâsiba ra ai!gû mâsib xa ra !aromahese.

Covid-19 tsoatsoas !nâ ge ǁîb tsîna ǀgaisase ra ǂhīgu!nâhe nē ǁōsa ǀkharib ase ǂansa i Namibiab !nâ Erongo ǀkharib, ge nēsi 39 493 khoena nē ǁkhōǁkhōsa ǁōs !oagu !khāǁkhae hâ tis ge ǂurusib ǂgaeǂguisa ǂoa ge wekheb !nâ gere ǂanǂan.