Minitera goyirugana nougendero John Mutorwa kuna manapo asi yirugana yokutura nzira zokuza kosure zaSatotwa kapisi pakare asi kapi vana kuzirugana morwa kapi kuna kara nzira zokukasika posure ozo.
Rukwangali
Sitata kuna kukakara noudigu womema
Sitata saVenduka kuna kuhundira vatungimo asi vahepa kuriuganesa mema monaruwa morwa doropa zonene ngesi kuna kara asi kugava mema tagakasesupa morwa payipi zaNamWater ezi kazitomokere esiku lina pitipo.
Wakudumo kahundilire vatungi konomurudi vahepa kugwana vendwa tintiko
Nguuru gomukunda Kavango zoupumezuva Bonifatius Wakudumo kahundilire vaAngola novaNamibia vafumadeke Covid-19 noveta nonongendeseso kukwama mwankenye sirongo omu vana diturapo nsene asi tokadingura pokatji koyirongo eyi yivali morwa ngesi nomurudi dina paturuka konyima tupu nomvhura mbali omu dapata.
Kwato mpito nkenye omu navawiza wonomukunda horowero edi ntano kepongo lyovagolikadi vaSWAPO
Mukunda horowero gwaZambezi ntani nomukunda dimwe dononunu moOtjozondjupa, Omaheke ntani Omusati kapi navakadipulisira vakakarepo pepongo lyenene lyombunga politika zaSWAPO zovagolikadi lina kukakarako mokwedi kooku tuna kara.
Kombisa zomuhoka kuna hara evango lyewa
Egano eli lyakarapo lyokutura asi vahepa kukara nevango lyokugava muhoka moDordabis, ngesi kuna kara asi kuna kugava muhoka ogu kovantu wokusika ko 90, omu muna hamene nonsigwe ntani vanona woruhepo, ngesi kuna kuhundira vaSamaritani wonkenda omu navanatungirapo nzugo zongwa vatunde nye kuruganena medi lyositji.
Munyandi kwamvhuu kadogorokere siruwo oso age kuna kundindira Ambulance
Gonomvhura 59 gedina Musialela Moses Luyanga, kuna kara nye gokuhulilira ogu ana kara asi munyandi kosikasama siruwo sooso kamukwete mvhuu siruwo oso age kuna kuduga wato momukuro gwaKasaya gwapita poKabbe kombindakano momukunda horowero gwaZambezi.
Mahundiro gonombapira dokusingisa kuna kara udigu koNATIS
Kutunda tupu opo zapaturuka ezi mberewa zokugwana nombudi sivike seesi, sinzi sovantu kwawiza komberewa ezi unene modoropa zaOshakati zaNaTIS omu vayaturamo mahundiro gokugwana nombapira dokukalironga kusinga.
Vakurona kapi vana yihafere yokutura vanona monombunga
Moomu tupu yina kumoneka asi erongo lyomvhura 2022 lina tameke momunene, vakurona momukunda gwaKhomas kavageve ruguwo rwawo konosure dimwe edi dina kara asi simpe kuna kukatwikira mokukagaununa vanona motumbunga omu navawiza kosure nampili ngomu asi epangero lyatanta nare asi vanona navenye vahepa kuza kosure siruwo simwe tupu.
Masini kagalire vantu vane
Ekoro limwe lyatunga momukunda gwaKongola poMwazi momukunda horowero Zambezi kavazumbanesere zinyakurwawo gomugara ntani vanona vatatu owo kavadogorokere momandaha ntani nkera morwa kavalire masini kavakohwere noyisima mosondaha.
Udigu womema kuna gumu nomukunda dokomuzogo
Usesu mokugava mema monomulihu daNamwater konomukunda dokomuzogo kuna kuninkisa vatungimo vagende sinano sosire vakavete mema momatope nomamakero mema aga navayaryuganesa vantu.