Silozi

Windoko ika amuhela hape mandu aka yahiwa kwasibaka sa Avis. Komponi yenca ikabizwa Avis Smart Village. 

Sikiliti sa Zambezi hasiboniwa kuba munyako wakuliba linaha zaSADC, mwakukwalula nzila yalipisinisi, mubusisi wasikiliti sa Zambezi Lawrence Sampofu ufitisize manzwi ahae kulumelelana ni babañwi kuli museto waKatima Mulilo uhuliswe kuba museto wakuyema feela hañwi. 

Muuna walilimo zemashumi aketalizoho kazene, natamilwe kamulatu wakuzuma nali yamuuna mwasibaka sapabalelo yalifolofolo sa Bwabwata mwasikiliti sa Zambezi. 

Liluko la makete likutiselize baoki ba278 banese bapumuzi famusebezi swalelele, kanako yelikana likweli zetalu kuisa kuzesilezi, kakuba kalulo yakualabela kwabutuku bwa Covid-19. 

​​​​​​​Kasamulaho alikweli zakutokwa kuziba hande ni butata bone batalimani nibona balimi, kalulo yakufelisa milalo kasamulaho akukona kutibela butuku bwa taku ni mulomo, bone buzuhile mwakweli ya Kandao 2021 mwasikiliti sa Zambezi, iamuhezwi kamazoho amabeli.

Mwakubata kuankufisa ni kutiiseza silikani salipisinisi mwahala Namibia ni Angola, likwambuyu walitaba zakwanda naha Netumbo Nandi-Ndaitwah cwanuñu uka etelela sikwata sabalipisinisi kuya mwanaha Angola kuyobata puluko yalipisinisi.

Muuna walilimo zemashumi aketalizoho kezelobañwi yana zibahalizwe kuba Moses Luyanga Musialela, nalatehezwi kibupilo bwahae, hana taselizwe kikubu hane afuluha mukolo mwanuka yaKasaya, mwasilalanda sa Kabbe ya Mbowela mwasikiliti sa Zambezi.

Muuna walilimo zemashumi aketalizoho nabonahalile mwakhuta yenyinyani ya Rundu viki yefelile kamulatu wakulima matokwani kwa Nkurenkuru.

Mubusisi wasikiliti sa Omusati Erginus Endjala, ubulela kuli bayembani kuzwelela naha Angola, babanze bakutela mwasikiliti baswanelwa kubihiwa kapili, kakuli habasa lumelelwa kuina mwanaha.

Muzamaisi walilukolo la tuto mwasikiliti sa Zambezi Josty Kawana ubulela kuli butata bwakutokwa lipula kwasikolo sa Muyako buka tatululwa pili kweli ye isika fela kale.