Omupolifi weedula 39 okwa xulifa eshi vati e limangelekela monduda yaye yokunangala efiku la shikula olo kwa li taka ingidifa ohango. 

Oshiningwanima eshi osha ningwa mexuliloshivike komukunda Onakazizi moshitukulwa shaShikoto. Nakufya okwa tongololwa oye Vaino Dhimbulukwa Vaino omukalimo womomukunda Onakazizi. 

Vaino okwa li ta longele keembelewa dakula dopolifi koWindhoek ongaChief Inspector. 

Omukulunhu wopolifi moshitukulwa shaShikoto Commissioner Ndafudha Iifo okwa hokolola ta ti nakufya ina fiya po omukanda tau yandje ouyelele kombinga yefyo laye. Opolifi oya hokolola tai ti Vaino okwa li e na okuninga omaingido ohango yaye Osoondaxa sha dja ko ashike okwe limangeleka Olomakaya. 

Otaku hokololwa kutya olutu laye ole lituwa kumumwainakadona e li meemhango monduda yaye. Opolifi oya hokolola tai ti efiku olo ongula Vaino okwa lombwela xe kutya ova pumbwa okulanda oipumbiwa yokulongifa momaingido. Otaku hokololwa kutya kakwa li ta ulike omadidiliko okulimangeleka efiku olo. 

Opolifi oya ti konima yefimbo eshi mumwainakadona a ya konduda yaVaino okwe lituwa a xulifa. 

Commissioner Iifo okwa kumaida ovapolifi opo va kale tava kongo omakwafo exungomwenyo ile tava popi novafitaongalo ngeenge tava hepekwa koupyakadi wopamadiladilo. 

Okwa ti oshikondo shopolifi oshi na ovafita hava longo nokukwafela ovapolifi tava hepekwa koupyakadi wopamadiladilo. 

fhamalwa@nepc.com.na